ზოგადი უნარების გამოცდაში აბიტურიენტების 15%-მა ზღვარი ვერ გადალახა

„აღმოჩნდა, რომ ზოგადი უნარების მესამე ვარიანტი უფრო რთული იყო, ვიდრე პირველი, მეორე და მეოთხე ვარიანტები. მესამე ვარიანტისთვის გამსვლელი ქულა იქნება 21. ყველა დანარჩენი ვარიანტისთვის გამსვლელი ქულა 24 და მეტია. დაახლოებით 15%-ია იმ აბიტურიენტების რაოდენობა, რომლებმაც კომპეტენციის მინიმალური ზღვარი ვერ გადალახეს. ამ რაოდენობის აბიტურიენტებმა ვერ მოახერხეს კომპეტენციის მინიმალური ზღვრის გადალახვა ზოგად უნარებში წინა წლებშიც. ეს ერთი მხრივ კარგია, მაგრამ უკეთესი იქნებოდა, უფრო უკეთესი შედეგები გვქონოდა“, - განაცხადა გამოცდების ეროვნული ცენტრის ხელმძღვანელმა მაია მიმინოშვილმა.

შეფასებისა და გამოცდების ეროვნულმა ცენტრმა ერთიანი ეროვნული გამოცდების შედეგების გამოცხადება დღეიდან დაიწყო. დღეს 12:00 საათზე ზოგადი უნარების გამოცდის შედეგი გამოქვეყნდა. აპლიკანტებს შესაძლებლობა აქვთ შედეგთან ერთად გაეცნონ საკუთარ ნაშრომებსაც. ორშაბათიდან, ეტაპობრივად, სხვა გამოცდების შედეგებიც გამოქვეყნდება.

გამოცდების ეროვნული ცენტრის ცნობით, ერთიან ეროვნულ გამოცდებზე წელს 41 200-მდე აბიტურიენტი იყო დარეგისტრირებული, თუმცა, ნაწილი გამოაკლდა იმის გამო, რომ გამოსაშვებ გამოცდებზე ერთ-ერთ საგანში მაინც ვერ გადალახეს მინიმალური ბარიერი. საბოლოოდ, გამოცდებში დაახლოებით 39 000-მდე აბიტურიენტი მონაწილეობდა. მათგან 3% გამოცდაზე არ გამოცხადდა.

2017 წლის ერთიანი ეროვნული გამოცდებისთვის საგამოცდო ცენტრები გახსნილი იყო საქართველოს ყველა ქალაქში, გარდა ოკუპირებული ტერიტორიებისა. მთელი საქართველოს მასშტაბით 22 საგამოცდო ცენტრი იყო, – თბილისში ათი საგამოცდო ცენტრია გახსნილი, ქუთაისში - სამი, ხოლო დანარჩენ ქალაქებში თითო საგამოცდო ცენტრი ფუნქციონირებდა.

ეროვნული გამოცდების საბოლოო შედეგები, მაია მიმინოშვილის განცხადებით, 5 აგვისტომდე გამოქვეყნდება.

[sknews.ge]