'მხარი დაუჭირეთ ქალებს პოლიტიკაში!' – აქციები ახალციხეში [Photo]

გენდერული თანასწორობისათვის ჟურნალისტთა ქსელის წევრებმა და დამწყებმა ჟურნალისტებმა ადგილობრივებს საინფორმაციო ბუკლეტები დაურიგეს და ქალების პოლიტიკაში ჩართვის მნიშვნელობაზე ესაუბრნენ.

მსგავსი აქცია-კამპანია საქართველოს რვა რეგიონის რვა ქალაქის: თელავის, რუსთავის, გორის, ახალციხის, ქუთაისის, ოზურგეთის, ზუგდიდისა და ბათუმის დიდ ბაზრებსა და ბაზრობებზე მასშტაბურად იმართება. აქცია ეწყობა „ჟურნალისტთა ქსელი გენდერული თანასწორობისათვის“ და „საზოგადოებრივ ინიციატივათა ჯგუფის“ ორგანიზებითა და ბრიტანული ორგანიზაცია “ოქსფამის” მხარდაჭერით.


კამპანიის მიზანია, ქალთა პოლიტიკური მონაწილეობის მნიშვნელობის შესახებ საუბრები გასცდეს შენობებს და დისკუსიაში ჩაერთოს ფართო საზოგადოება – ადამიანები რომლებსაც არ აქვთ შესაძლებლობა დაესწრონ სხვადასხვა კონფერენციებს, ტრენინგებს, საჯარო განხილვებს და ღონისძიებებს.

ამჟამად საქართველოს პარლამენტში 150 დეპუტატიდან მხოლოდ 18–ია ქალი (12%). ამ მაჩვენებლით საქართველო ერთ-ერთ ბოლო ადგილს იკავებს მსოფლიოში პარლამენტში ქალთა წარმომადგენლობის თვალსაზრისით და 185 ქვეყანას შორის 115–ე ადგილზეა.


საკრებულოებში არჩეულ 2083 წევრს შორის, ქალი მხოლოდ 246–ია (11.8%). თელავის, წალკის, ასპინძისა და ფოთის საკრებულოებში არც ერთი ქალი დეპუტატი არ არის. 59 მუნიციპალიტეტიდან მხოლოდ 1 მუნიციპალიტეტის (თიანეთის) გამგებელია ქალი. არც ერთი გუბერნატორი და ქალაქის მერი ქალი არ არის. მაშინ, როდესაც ქვეყნის ამომრჩეველთა 53% არის ქალი.

"თუ გვსურს, რომ ქვეყანა წარმატებული იყოს და უკეთეს პირობებში ვიცხოვროთ, მაშინ ქვყნის მართვაში აუცილებლად უნდა მიიღოს მონაწილეობა მოსახლეობის ნახევარზე მეტმა – ქალებმა. იმ ქვეყნებში, სადაც ქალები აქტიურად არიან ჩართული გადაწყვეტილების მირების პროცესში, უფრო სწრაფად ვითარდება დემოკრატიაც და ეკონომიკაც", – აცხადებენ აქციის ორგანიზატორები.

ამავე კამპანიის ფარგლებში, ახალციხეში საინფორმაციო სტიკერებიც გაიკრა, სლოგანით: "აირჩიე სწორი გზა, მიეცი შენი ხმა ქალს"



















[ნინო ნარიმანიშვილი, ახალციხე]