'აირჩიე თანასწორობა' – საინფორმაციო აქცია საქართველოს 8 ქალაქში [Photo]

ქალთა პოლიტიკური მონაწილეობის მხარდასაჭერი აქცია, 27 ნოემბერს, 13:00 საათზე, ერთდროულად გაიმართა საქართველოს 8 ქალაქში: თელავში, რუსთავში, გორში, ახალციხეში, ქუთაისში, ოზურგეთში, ზუგდიდსა და ბათუმში.

8–ვე ქალაქში გენდერის მედიაცენტრების წარმომადგენლებმა მოსახლეობას საინფორმაციო მასალები დაურიგეს და ქალთა პოლიტიკური მონაწილეობის მნიშვნელობასა და უზრუნველყოფის მექანიზმებზე ესაუბრნენ.

ღონისძიებები ქალაქების ცენტრალურ ქუჩებსა და ხალხმრავალ ადგილებში გაიმართა.

ახალციხის გენდერის მედიაცენტრის ხელმძღვანელმა ახალციხის ცენტრალურ პარკში საინფორმაციო ბუკლეტები ახალციხის გენდერული კლუბის წევრებთან ერთად დაარიგა.

ამჟამად საქართველოს პარლამენტში 150 დეპუტატიდან მხოლოდ 18–ია ქალი (12%) და ერთ-ერთ ბოლო ადგილს იკავებს მსოფლიოში პარლამენტში ქალთა წარმომადგენლობის თვალსაზრისით. საკრებულოებში არჩეულ 2083 წევრს შორის, ქალი მხოლოდ 246–ია (11.8%). თელავის, წალკის, ასპინძისა და ფოთის საკრებულოებშიკი არც ერთი ქალი დეპუტატი არ არის. 59 მუნიციპალიტეტიდან მხოლოდ 1 მუნიციპალიტეტის (თიანეთის) გამგებელია ქალი. არც ერთი გუბერნატორი და ქალაქის მერი ქალი არ არის.

„მაშინ, როდესაც ქვეყნის ამომრჩეველთა 53% არის ქალი, ეს ყველაფერი იწვევს უთანასწორობისა და უსამართლობის განცდას“, – აცხადებენ აქციის ორგანიზატორები.









[ნინო ნარიმანიშვილი, ახალციხე]