თქვენ თითქოს ტრადიციად გაქვთ ყვავილების ჩუქება - მეყვავილეები ახალციხიდან [Photo]

მიუხედავად იმისა, რომ გამყიდველთა ნაწილი თავადაც დედაა, მათთვის გამოყოფილ ამ ერთ დღეს ქუჩაში ატარებენ, იმ მიზნით, რომ ოჯახს მცირედი თანხა შემატონ.

მეყვავილეთა უმრავლესობას საკუთარი ვინაობის გამჟღავნება არ სურს, თუმცა არიან ისეთები, რომლებიც საუბარზე სიამოვნებით გთანხმდებიან.


ასია კირანიანი ახალციხეში ცხოვრობს, ყვავილებს თითქმის ყველა დღესასწაულზე ყიდის. ამბობს, რომ მოგება არც თუ ისე დიდია, მაგრამ, მოგებაზე მეტად მყიდველების ბედნიერი სახეები ახალისებს. დღეს მყიდველებისთვის დიდი არჩევანი რომ ჰქონოდათ, ფინანსების მოძიება დასჭირდათ.

„სესხი ავიღე, რომ ბევრი ყვავილი მქონოდა. დღის ბოლოს დარჩენილი ყვავილები, ნაგვის ურნაში აღმოჩნდება. ჯერ არ კი ვიცი, მეყოფა თუ არა აღებული ფული ვალის დასაფარად“, – ამბობს იგი.



მეყვავილეთა შორის არა მხოლოდ ადგილობრივები, სხვა რეგიონებიდან ჩამოსულებიც გვხვდებიან. მაგალითად, დები ზესტაფონიდან, რომელთაც რატომღაც ვინაობის გამხელა არ სურთ. ისინი ამბობენ, რომ საკუთარ ეზოში მოყვანილ ყვავილებს ყიდიან.

კითხვაზე, რამდენად ღირდა ამხელა გზის გამოვლა, ან რატომ ახალციხეში, გვპასუხობენ: „დეიდა, ზესტაფონში ვინ იყიდის ყვავილებს?! ყვავილების გაყიდვა თუ გინდა, ახალციხეში უნდა ჩამოხვიდე. თქვენ თითქოს ტრადიციად გაქვთ ყვავილების ჩუქება, ვერცერთ სხვა რეგიონში ვერ ვყიდით ყვავილებს ისე, როგორც აქ. რაღა დაგიმალოთ და ჩემთვის მეუღლესაც კი არ უჩუქებია არასდროს ყვავილები“, – ამბობენ და ამატებენ, რომ დღის ბოლოს, როცა მყიდველების ნაკადი შეწყდება, დარჩენილ ყვავილებს გამვლელებს აჩუქებენ, – „განსაკუტრებით გვიყვარს ყვავილები, გადასაყრელად ვერ ვიმეტებთ“.



პეტრე ნიკოღოსიანიც ადგილობრივია. უკვე წლებია დედის დღეს, ასევე სხვა დღესასწაულებზეც,ყვავილებს ყიდის. დღეს იგი მეუღლესთან ერთად დგას ყვავილების დახლთან და ხან სიმღერით, ხან ლექსის თქმით ატარებს ამ დღეს. მას ყველაზე მეტად ის ახარებს, რომ ყვავილებს ასაკის მიუხედავად ყველა ყიდულობს და აბედნიერებენ ზოგჯერ ახალგაზრდა, ზოგჯერ კი თმაში ჭაღარაშერეულ დედებს.

დედის დღე თითქოს ჩვეულებრივი, მაგრამ მაინც რაღაცით გამორჩეული დღეა. მიუხედავად იმისა, რომ მოქალაქეების ნაწილის თქმით, 3 მარტი მათთვის არაფერს ნიშნავს, ამ დღეს მაინც ბევრი ელის, სხვადასხვა მიზეზით, ზოგი ყოჩივარდების მოლოდინში, ზოგი კი კლიენტის გულუხვობის.ამ დღეს ახალციხეც, ყველა სხვა დღეებისგან განსხვავებით, უჩვეულოდ ფერადი და ხალხმრავალია.

[ეკა ბერიძე, ახალციხე]