‘ვცდილობთ, რომ ფეხზე წამოვდგეთ’- ახალციხეში მაღაზიებმა მუშაობა განაახლეს

ახალციხეში, დიდიმამიშვილის ქუჩაზე მდებარე სამშენებლო მაღაზია დღეს გაიხსნა. მეპატრონის, გრიგორ ამირხანიანის განცხადებით, პირველ ეტაპზე, სანამ მარაგი ამოეწურებათ, პროდუქციას ძველ ფასში გაყიდიან, თუმცა შემდეგ მომატება მოუწევთ.

„ორ თვეზე მეტი გაჩერებულები ვიყავით, ვერც ონლაინ ვყიდდი . წარმოიდგინეთ ერთ ნივთს ახლა 20 ლარად რომ გავყიდი და იგივეს შემდეგ 25 ლარში შევიძენ, ეს რას ნიშნავს. დოლარის კურსი რომ გაიზარდა ეს სიძვირე მაგან მოიტანა. ხალხისთვის და ჩვენთვისაც ძნელია“, - ამბობს მაღაზიის მეპატრონე გრიგორ ამირხანიანი.

დღეიდან განაახლა მუშაობა „ლოს-ყვავილებმაც“, მაღაზიის მფლობელი ბიძინა გოგოლაძე ამბობს, რომ ყვავილები ორი დღის წინ მიიღო და შესაბამისი რეკომენდაციების დაცვით გაყიდის.

„მეც ვიზარალე პანდემიის გამო. ყვავილების ნაწილი გადავყარე, მოგვიანებით მთავრობამ დაუშვა ონლაინ ვაჭრობა, მაგრამ უკვე ყვავილები აღარ იშვებოდა. დღეიდან განვაახლეთ მუშაობა და ვიცავთ რეკომენდაციებს, ვცდილობთ რომ ისევ ფეხზე წამოვდგეთ“, – ამბობს ბიძინა.

მისი თქმით, ყვავილების ფასმა უმნიშვნელოდ მოიმატა: „საქართველოს სხვადასხვა კუთხიდან შემომაქვს“.

მაღაზია „მარსეას“ ყვავილები სომხეთიდან შემოჰქონდა, საზღვრების ჩაკეტვის შემდეგ, მაღაზიის მეპატრონეებმა ყვავილების ნაცლად ხილ–ბოსტნეულის გაყიდვა დაიწყეს.

„დაახლოებით 300-400 ლარის ყვავილის გადაყრა მოგვიწია. ახლა ხალხს ფული არ აქვს და არც ყვავილებს ყიდულობენ. თან საზღვრები ჩაკეტილია და ვეღარ შემომაქვს. დავიწყეთ ხილ–ბოსტნეულის გაყიდვა“, - ამბობს „მარსეას“ მეპატრონე სუმბატ კარაპეტიანი.

დღეიდან 11 მაისიდან, დაწესებული შეზღუდვების მოხსნის მესამე ეტაპი ამოქმედდა, მუშაობა განაახლა ყველა სახის წარმოებამ, ასევე გაიხსნა საცალო და საბითუმო მაღაზიები, გარდა მოლებისა.

მთავრობის გადაწყვეტილებით მუშაობის უფლება აქვს იმ მაღაზიებს, რომლებსაც შესასვლელი ქუჩიდან აქვს და არ ვაჭრობენ ტანსაცმელით და ფეხსაცმელით.



[მარიამ ბარძიმაძე,ახალციხე]