TDI სოფელ ადიგენში მუშაობისას ხელისშეშლაზე საუბრობს

სოფელი ადიგენი, 1 მარტი. ფოტო: "სამხრეთის კარიბჭე"

ორგანიზაციის განცხადებას უცვლელად გთავაზობთ:

"ტოლერანტობის და მრავალფეროვნების ინსტიტუტი (TDI) სწავლობს სოფელ ადიგენში მუსლიმთა წინააღმდეგ განხორციელებული ძალადობის ფაქტებს და არსებულ ვითარებას. TDI-ს იურისტები ამ დროისთვის ადგილზე იმყოფებიან, ხვდებიან დაზარალებულებს და მათ სამართლებრივ დახმარებას უწევენ.

ცოტა ხნის წინ, როდესაც TDI-ს თანამშრომლები ერთ-ერთი დაზარალებულის სახლში იმყოფებოდნენ და ახსნა-განმარტებებს იღებდნენ, შენობაში შეიჭრა აგრესიულად განწყობილი სამი პიროვნება. მათი გაღიზიანება ადგილზე TDI-ს იურისტების ყოფნამ გამოიწვია. აცხადებდნენ, რომ „სოფელი თავის სამართალს თვითონ გადაწყვეტს“. ადგილზე გამოძახებული იქნა პოლიცია, რომელმაც აღნიშული პირები გაარიდა ადგილიდან.

TDI-ის ერთი იურისტი ამ წუთებში ესწრება დაზარალებულების დაკითხვას, ხოლო მეორე იურისტი მოწმეებისგან ახსნა-განმარტებებს იღებს.
ა.წ. 29 თებერვალს სოფელ ადიგენში მუსლიმი თემის სამ წარმომადგენელს ფიზიკური და სიტყვიერი შეურაცხყოფა მიაყენეს. მუსლიმი თემის განცხადებით, მათ ადგილობრივი მართლმადიდებელი თემის წევრები დაესხნენ თავს. დაპირისპირება სოფელ ადიგენში მუსლიმი თემისთვის სასაფლაოს ტერიტორიის გამოყოფის საკითხს მოჰყვა.

აღსანიშნავია, რომ 2012 წლიდან მუსლიმთა დევნის, რელიგიური წესის აღსრულებისათვის ხელის შეშლისა და მათი უფლებების დარღვევის არაერთ შემთხვევას ჰქონდა ადგილი (ნიგვზიანი, წინწყარო, სამთაწყარო, ჭელა, ქობულეთი, მოხე). სახელმწიფოს არცერთ აღნიშნულ შემთხვევაში არ მოუხდენია ადეკვატური რეაგირება და არ დამდგარა არცერთი პირის პასუხისმგებლობის საკითხი", – ვკითხულობთ განცხადებაში.

შეგახსენებთ, გუშინ, 29 თებერვალს, სოფელ ადიგენში ადგილობრივი მუსლიმი და ქრისტიანი თემი ჯერ სიტყვიერად დაუპირისპირდა ერთმანეთს, შემდეგ კი ფიზიკურად. საქართველოს შინაგან საქმეთა სამინისტრომ მომხდარზე გამოძიება 156–ე, დევნის მუხლით დაიწყო.

[ნინო ნარიმანიშვილი, ადიგენი]