შსს–მ ადიგენში მომხდარ რელიგიურ დაპირისპირებაზე საქმე აღძრა

ადიგენის რაიონული სამმართველო

მომხდარზე უკვე დაკითხეს სოფელ ადიგენში მცხოვრები, ერთ–ერთი დაზარალებული ავთანდილ იაკობაძე. იაკობაძეს სამართალდამცველები გვიან ღამიდან დილის 06:00 საათამდე კითხავდნენ.

გუშინდელი დაპირისპირების შედეგად ავთანდილ იაკობაძეს სამედიცინო დახმარებაც დასჭირდა. როგორც სასწრაფო – სამედიცინო დახმარების სამსახურში „სამხრეთის კარიბჭეს“ განუცხადეს, იაკობაძეს თავის არეში ღია ჭრილობა ჰქონდა და სასწრაფო დახმარების სამსახურმა ადიგენის სამედიცინო დაწესებულებაში გადაიყვანა. ამ დროისთვის იაკობაძე სახლში იმყოფება.


ავთანდილ იაკობაძე.

შეგახსენებთ, ადიგენის მუნიციპალიტეტის სოფელ ადიგენში დაპირისპირების მიზეზი მუსლიმი თემის მიერ სასაფლაოს ადგილის მოთხოვნა გახდა. ვითარების ესკალაცია რელიგიის სააგენტოს 25 თებერვლის რეკომენდაციამ გამოიწვია, რომლის მიხედვით, ადიგენის ადგილობრივმა თვითმმართველობამ მუსლიმთა სასაფლაოსთვის ადგილი უნდა გამოყოს.

გუშინ, სოფელ ადიგენში ადგილობრივი მუსლიმი და ქრისტიანი თემი ჯერ სიტყვიერად დაუპირისპირდა ერთმანეთს, შემდეგ კი ფიზიკურად. დაშავებულია სამი ადამიანი. სოფელს ამ დრომდე იცავენ სამართალდამცველები.

მომხდარის შესწავლა შინაგან საქმეთა სამინისტრომ გუშინვე დაიწყო. გუშინ შსს–ში აცხადებდნენ, რომ საქმე იმ შემთხვევაში აღიძვრებოდა, თუ მომხდარში სისხლის სამართლის დნაშაულის ნიშნები გამოიკვეთებოდა.

156–ე მუხლის 1–ლი ნაწილი გულისხმობს ადამიანის დევნას სიტყვის, აზრის, სინდისის, აღმსარებლობის, რწმენის ან მრწამსის გამო, ანდა მის პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებით და ისჯება ჯარიმით ან თავისუფლების შეზღუდვით ვადით ორ წლამდე ანდა თავისუფლების აღკვეთით იმავე ვადით.

[ნინო ნარიმანიშვილი, თამუნა უჩიძე, ადიგენი]