საფლავის ადგილის თანხა ამიერიდან ახალციხის ბიუჯეტში შევა

დღეს, 29 თებერვალს ქალაქ ახალციხის საკრებულოს სხდომაზე, დეპუტატებმა ქალაქ ახალციხის მუნიციპალიტეტის სასაფლაოების მოწყობისა და მოვლა–პატრონობის წესი დაამტკიცეს. ახალი წესის თანახმად, ქალაქის ტერიტორიაზე არსებულ სასაფლაოებზე საფლავის ადგილის გამოყოფისთვის გადახდილი თანხა ადგილობრივ ბიუჯეტში ჩაირიცხება.

ქალაქის ტერიტორიაზე სასაფლაოების მოვლა–პატრონობაზე წლებია შპს „სავანე“ ზრუნავდა. შპს–ს ანგარიშზე ირიცხებოდა მიცვალებულის დასაკრძალი ადგილისთვის გადახდილი თანხაც.

„შპს „სავანე“ ახალციხის მუნიციპალიტეტის გამგეობამ 2011 წელს შექმნა. 2013 წლიდან შპს– ს მე ვხელმძღვანელობ. ამ დრომდე „სავანეს“ აქვს თავისი პირადი ანგარიში, შემოსული თანხა სასაფლაოს მოვლა–პატრონობასა და თანამშრომლების ხელფასებს ხმარდებოდა. შპს–ს განმკარგველი ქალაქის მერიაა და როგორც უკეთესია, ისე გადაწყდება“, – ამბობს შპს „სავანეს“ დირექტორი პავლე მაღრაძე.

ახალციხის მერიის იურიდიული სამსახურის უფროსი მერი გოგოლაური ამბობს, რომ სასაფლაოების მოვლა–პატრონობის წესი, რომელიც სახელმძღვანელო იქნება შპს „სავანესთვის“ აქამდე არ არსებობდა: „ამიერიდან ჭირისუფლის მერი გადახდილი 60 ლარი, ნაცვლად შპს–ს პირადი ანგარიშისა, ჩაირიცხება ადგილობრივ ბიუჯეტში. ამ თანხით სასაფლაოს ტერიტორიაზე ინფრასტრუქტურა მოწესრიგდება“.

საკრებულოს უმცირესობის წევრი ჯიმშერ გოგოლაური ფიქრობს, რომ სასაფლაოს ადგილისთვის 60 ლარი დიდი თანხაა: „ ჩვენი ჯიბიდან ნუ განვსაზღვრავთ, ხომ შეიძლება 60–ის მაგივრად 30 ლარი იყოს“.

მერი გოგოლაური კი ამბობს, რომ ფასის გადახედვა არ იგეგმება. რაც შეეხება გაჭირვებულ ოჯახებს, ამ შემთხვევაში სოციალურად დაუცველ მოსახლეობას დაკრძალვის ხარჯების გაღება არ მოუწევს: „გადასახადის რაოდენობა ახლა არ გაზრდილა. წლების განმავლობაში 60 ლარი იყო“.

გარდა აღნიშნულისა, შპს „სავანეს“ ხელმძღვანელობას უფლება აქვს ჭირისუფალთან ხელშეკრულება ინდივიდუალურად გააფორმოს, რის საფუძველზეც გარკვეული თანხის გადახდის შემდეგ, შპს–ს თანამშრომლები საფლავსაც დაასუფთავებენ. რა ეღირება ეს მომსახურება, ამ ეტაპზე განსაზღვრული არ არის.

[თინათინ ზაზაძე, ახალციხე]