ახალციხეში პოლიცია რეიდს ატარებს, ამოწმებენ ყველა მანქანას

ქალაქში საპატრულო პოლიციის ეკიპაჟების გარდა, მოძრაობენ სამართალდამცველების სამოქალაქო მანქანებიც.

რეიდების შესახებ „სამხარეთის კარიბჭეს“ ჟურნალისტებთან არაერთმა მოქალაქემ დარეკა, მათ შორის, რამდენიმემ ისეთმა, ვინც პოლიციამ გააჩერა და შეამოწმა.

ქალაქში გავრცელებულია რეიდების მიზეზის რამდენიმე ვერსია, მათ შორის, თითქოს ქალაქში ქურდობა მოხდა და პოლიცია დამნაშავეს ეძებს და ასევე, ერთი ვერსიით, სამართალდამცველებმა ერთ–ერთი მოქალაქის ბინიდან იარაღი ამოიღეს, ბინის მესაკუთრე გაიქცა და ახლა მას ეძებენ.

გარდა ამისა, "სამხრეთის კარიბჭეს" აქვს დადასტურებული ინფორმაცია იმის შესახებ, რომ ამ წუთებში სამართალდამცველები ახალციხეში ერთ–ერთი მოქალაქის სახლს ჩხრეკენ. როგორც ბინის მეპატრონეს განუმარტეს, მის სახლში ნაქურდალ ნივთს ეძებენ.

ამ ვერსიებისა და რეიდების მიზეზის გარკვევა "სამხრეთის კარიბჭემ" საქართველოს შინაგან საქმეთა სამინისტროში სცადა. უწყებაში ირწმუნებიან, რომ ქალაქში განსაკუთრებული არაფერი ხდება.

შსს–ს საზოგადოებასთან ურთიერთობის სამსახურში განგვიმარტეს, რომ ახალციხეში ჩვეულებრივი საპოლიციო კონტროლი ხორციელდება, ასეთი შემოწმება ახლა საქართველოს სხვა ქალაქებშიც მიმდინარეობს.

[ნინო ნარიმანიშვილი, თამუნა უჩიძე, ახალციხე]