სამცხე–ჯავახეთში ისევ რეიდებია

სამართალდამცველები ავტომანქანებსა და ფეხით მოსიარულეებს აჩერებენ და საბუთებს უმოწმებენ. შემოწმებები განსაკუთრებულად ადმინისტრაციული ცენტრების შესასვლელებსა და გასასვლელებში ტარდება.

საქართველოს შინაგან საქმეთა სამინისტროს ინფორმაციით, საპოლიციო კონტროლი ქვეყნის მთელ ტერიტორიაზე შინაგან საქმეთა მინისტრის ბრძანებით დაიწყო. ამ ეტაპზე უცნობია, რეიდები როდის დასრულდება.

"მინისტრის ბრძანებით დაიწყო და მინისტრის ბრძანებით დასრულდება", – განუცხადეს "სამხრეთის კარიბჭეს" საქართველოს შინაგან საქმეთა სამინისტროში.

ბოლოს მსგავსი მასშტაბური რეიდები ქვეყნის მასშტაბით 18–19 თებერვალს მიმდინარეობდა. შინაგან საქმეთა სამინისტროს ინფორმაციით, მაშინ, ორდღიანი საპოლიციო კონტროლის შედეგად, სისხლის სამართლის დანაშაულის 101 და ადმინისტრაციულ სამართალდარღვევათა 769 ფაქტი გამოვლინდა.

გაეცანით ინფორმაციას იმის შესახებ, რატომ ცხადდება საპოლიციო კონტროლი და ასევე, მოქალაქის უფლებებსა და პოლიციის ვალდებულებებს რეიდის დროს.

[ნინო ნარიმანიშვილი, ახალციხე]