რა თანხა გაიხარჯა ახალციხის მერის სარეზერვო ფონდიდან

2015 წელს ახალციხის მერის სარეზერვო ფონდი 120.000 ლარს შეადგენდა. აღნიშნული თანხიდან გასულ წელს მხოლოდ 41 401 ლარი გაიხარჯა.

გახარჯული თანხის თითქმის ნახევარი, 20 000 ლარი თბილისში 13 ივნისის სტიქიის შედეგად დაზარალებულთა დასახმარებლად, ფინანსთან სამინსიტროს გადაწყვეტილებით გახსნილ სპეციალურ ანგარიშზე გადაირიცხა.

დარჩენილი თანხა 21 401 ლარი კი ასე გადანაწილდა:

4.600 ლარი დაიხარჯა ივნისში, სამცხე–ჯავახეთის სახელმწიფო უნივერსიტეტის ქორეოგრაფიული ანსამბლის თურქეთში ტრანსპორტირებისთვის.

938 ლარით, ივლისში ძლიერი წვიმის შედეგად დაზარალებულ მოქალაქეს გაეწია დახმარება.

1500 ლარი დაიხარჯა ოქტომბერში გაჭირვებული სამი ოჯახის ერთჯერადი დახმარებითვის.

ნოემბერში, მოქალაქის ოპერაციის დაფინანსებისთვის 302 ლარი იქნა გათვალისწინებული, ხოლო 4 566 ლარით დაეხმარნენ ერთ–ერთ ოჯახს დაზიანებული სახლის აღდგენისთვის.

ამავე თვეში, 2500 ლარი გადაერიცხა შიტო–კაი შიტო რიუს კლუბ „საფარას“ ღია საკლუბო ევროპის ჩემპიონატზე მონაწილეობის მიღებისთვის.

ყველაზე მეტი დახმარება ქალაქის მერმა დეკემბერში გასცა 6 995 ლარის ოდენობით, აქედან 5 795 ლარი 11 დეკემბერს ძლიერი ქარის შედეგად დაზიანებული საცხოვრებელი სახლის სახურავების შეკეთებისთვის 16 ოჯახს გადაერიცხა.

1200 ლარი კი (200–200 ლარის ოდენობით) მერმა ექვს სპორტსმენს , თელავში გიორგი რეხვიაშვილის სახ.საქ. თასის მეექვსე გათამაშებაზე გუნდური პირველი ადგილის დაკავებისთვის გადასცა.

ახალციხის მერიაში განმარტავენ, რომ სარეზერვო ფონდი წელსაც 120 000 ლარით განისაზღვრა.

[თინათინ ზაზაძე, ახალციხე]