ახალციხის მერიამ 22 016 ლარის ნაგვის ურნები შეიძინა

ქალაქ ახალციხის მერიამ 31 ცალი ახალი ნაგვის ურნა შეიძინა. აღნიშნულისთვის ადგილობრივი ბიუჯეტიდან 22 016 ლარი დაიხარჯა. ნაგვის ურნების შეძენა ტენდერში გამარჯვებულ შპს „ექსიმ ტრაფიკს“ დაევალა.

ახალციხის მერიაში განმარტავენ, რომ ახალი ნაგვის ურნების ნაწილი მოძველებულ ურნებს ჩაანაცვლებს, ნაწილი კი იმ ქუჩებზე დაიდგმება, სადაც ასფალტი საფარი დაიგო.

"აღნიშნულის შემდეგ მოსახლეობას გაუადვილდება ნარჩენების გატანა, რაც გაზრდის მომსახურეობის ხარისხს და დასუფთავების პრობლემას მოხსნის“, - აცხადებს ქალაქ ახალციხის მუნიციპალიტეტის მერი გიორგი კოპაძე.

შპს "კეთილმოწყობის" სამსახურში კი განმარტავენ, რომ ახალი ნაგვის ურნების შეძენა აუცილებელი იყო, რადგან ზოგ ქუჩაზე ურნები დაზიანებული და მწყობრიდან გამოსულია.

"აგრეთვე გათვალისწინებულია ის ქუჩებიც, სადაც ახალახან დაიგო გზა (ეგრეთ წოდებული "აძინაცატების დასახლება" და რაბათის უბანი)“, -ამბობს შპს „კეთილმოწყობის" სამსახურის უფროსის დროებით მოვალეობის შემსრულებელი გიორგი ლონდარიძე.

ახალ ნაგვის ურნებს ქალაქის ქუჩებში უახლოეს დღეებში განათავსებენ.

[sknews.ge]