რას გეგმავს ახალციხის საკრებულო მოქალაქეების ჩართულობის გასაუმჯობესებლად

მოსახლეობასთან კომუნიკაციისა და საკრებულოს საქმიანობაში ადგილობრივების ჩართულობის ხარისხზე საკრებულოს დეპუტატებმა 29 იანვარს გამართულ, საკრებულოს რიგით პირველ სხდომაზე იმსჯელეს.

„ჩვენი ნაკლოვანებებია, რომ კომუნიკაცია და მოსახლეობის ჩართულობა საკრებულოს საქმიანობაში დაბალია. არ გვაქვს ინტენსიური კომუნიკაცია აღმასრულებელ ხელისუფლებასთან, ასვე რეგიონულ სამსახურებთან. გვინდა მოსახლოება მაქსიმალურად იყოს ჩართული საკრებულოს საქმიანობაში“, – განაცხადა ქალაქ ახალციხის მუნიციპალიტეტის საკრებულოს თავმჯდომარემ დავით ლომიძემ.

მისი თქმით, მოსახლეობის გასააქტიურებლად საკრებულო ქუჩების მიხედვით კრებების ჩატარებას გეგმავს: „ინფრასტრუქტურული პროექტების პრიორიტეტების განსაზღვრაში მოსახლეობამ უნდა მიიღოს მონაწილეობა. შესაძლებელია, რომელიმე უბანში ასფალტია დასაგები, მაგრამ აღნიშნულ ქუჩაზე მცხოვრებლებს სხვა პრიორიტეტი აქვთ. ამიერიდან, მოსახლეობასთან შეთანხმების გარეშე პროექტები არ განხორციელდება“.

კითხვაზე, აქამდე რატომ არ იყო მოსახლეობა აქტიურად ჩართული, საკრებულოს თავმჯდომარემ განაცხადა, რომ აქამდე ახალციხე, როგორც თვითმმართველი ქალაქი, ჩამოყალიბების პროცესში იყო.

„თვითმმართველი ქალაქის შექმნასთან დაკავშირებით გარკვეული პრობლემები იყო. დეპუტატები თვითონ არ შებულობდნენ მონაწილეობას პრიორიტეტების განსაზღვრაში, ისინი არ იყვნენ საქმის კურსში, რა პროექტები განხორცილედებოდა“, – ამბობს დავით ლომიძე.

[თინათინ ზაზაძე, ახალციხე]