ახალციხის დეპუტატებმა მოსახლეობასთან შეხვედრების განრიგი დაამტკიცეს

შეხვედრების განრიგი ახალციხის საკრებულოს 33–ვე დეპუტატთან ინდივიდუალურადაა შედგენილი, თუმცა, საკრებულოს თავმჯდომარესთან შეთანხმებით, შესაძლოა, შეხვედრების დრო შეიცვალოს კიდეც.

„თუ რომელიმე დეპუტატი განრიგის მიხედვით შეხვედრის ჩატარებას ვერ შეძლებს და დროს შეცვლის, იგი ამის შემსახებ ახსნა–გამარტებით მაცნობებს. დეპუტატთან შეთანხმებითვე გაიწერება ხელახლა მოსახლეობასთან შეხვედრის დრო და ადგილი“, – ამბობს ახალციხის საკრებულოს თავმჯდომარე გელნა ნოზაძე.

მისი თქმით, შეხვედრებს თავადაც დაესწრება: „გააჩნია რა საკითხები იქნება განსახილველი. დაგეგმილი თემების მიხედვით შეხედრებზე იქნებიან სხვა თანამშრომლებიც. მაგალითად თუ ინფრასტრუქტურულ საკითხებს განიხილავენ ინფრასტრუქტურის სპეციალისტები და ა.შ“.

ახალციხის მუნიციპალიტეტის საკრებულოს წევრების მოქალაქეებთან შეხვედრების განრიგის შესახებ ბრძანება საკრებულომ სამ აპრილს მიიღო.

დეპუტატების ერთ–ერთი მოვალეობა, მათ სამოქმედო ტერიტორიაზე მცხოვრებ მოსახლეობასთან პერიოდული შეხვედრაა. თუმცა, საკრებულოს პირველი შეკრებიდან სამი თვის განმავლობაში დეპუტატებს მოსახლეობასთან არცერთი საჯარო შეხვედრა არ ჰქონდათ გამართული.

[თამუნა უჩიძე, ახალციხე]