ამოქმედდა თუ არა მართვის მოწმობის 100 ქულიანი სისტემა – შსს–ს განმარტებები

როგორც სამინისტროში განმარტავენ, 2016 წლის 1 იანვრიდან არ ამოქმედებულა არც მართვის მოწმობაზე მინიჭებული შეფასების ე. წ. 100 ქულიანი სისტემა.

„აღნიშნული ინიციატივა პარლამენტის განხილვის საგანია და ჯერ მხოლოდ კანონპროექტის სახითაა წარმოდგენილი. ეს იმას ნიშნავს,რომ არანაირი სამართლებრივი საფუძველი , რომ მართვის მოწმობებთან მიმართებაში მსგავსი რეგულაცია ფუნქციონირებდეს, არ არსებობს“, – განმარტავს საქართველოს შინაგან საქმეთა სამინისტროს საზოგადოებასთან ურთიერთობის დეპარტამენტის დირექტორი თეა პერტაია.

მისივე განცხადებით, იმ შემთხვევაში, თუ ეს კანონპროექტი კანონის ძალას მიიღებს, დაიწყება ფართომასშტაბიანი საინფორმაციაო კამპანია და შესაბამისად, ამის თაობაზე თითოეული მძღოლი ინფორმირებული იქნება.

შეგახსენებთ, სახელწოდებით "შენი გულისთვის – შენი უსაფრთხოებისთვის",შინაგან საქმეთა სამინისტრო საგზაო მოძრაობის უსაფრთხოების ახალ პროგრამას იწყებს. პროგრამის პრეზენტაცია შინაგან საქმეთა სამინისტროში გასული, 2015 წლის 3 დეკემბერს შედგა.

პროგრამა რამდენიმე კომპონენტს მოიცავს: ავტოსაგზაო შემთხვევების მთავარი მიზეზების წინააღმდეგ (არასწორი მანევრირება, სიჩქარის გადაჭარბება, ალკოჰოლის ზემოქმედების ქვეშ მართვა და სხვა) ადმინისტრირების გაუმჯობესება; სამგზავრო ავტობუსების მოძრაობაზე კონტროლის გაუმჯობესება; ქვეყანაში არსებული ავტოპარკის განახლების წახალისება; სიჩქარის მობილური დეტექტორების გამოყენება, ე.წ. „უკონტაქტო პატრულირება“; გზებზე და ქალაქებში არსებული „შავი წერტილების“ განეიტრალება; 2016 წლის მარტიდან მარჯვენასაჭიანი ავტომობილების იმპორტის შეზღუდვა; ფეხით მოსიარულეთა უსაფრთხოებისთვის კანონმდებლობის გამკაცრება; მოძრაობის წესების დარღვევებზე ქულების სისტემის შემოტანა და მართვის მოწმობის ტესტის რეალურ მოძრაობაში გადატანა.

შინაგან საქმეთა სამინისტროში განმარტავენ, რომ ამ ეტაპზე პროგრამის არცერთი კომპონენტი არ ამოწმედებულა.

[ნინო ნარიმანიშვილი, ახალციხე]