საქართველოში ფარული პატრულირების შემოღება იგეგმება

ამის შესახებ შინაგან საქმეთა მინისტრის მოადგილემ შალვა ხუციშვილმა შსს-ში, საგზაო მოძრაობის უსაფრთხოების ახალი პროგრამის პრეზენტაციისას განაცხადა.

"მნიშვნელოვანი სიახლე იქნება ასევე საქართველოსთვის პოლიციის შესაძლებლობის გაძლიერება და ფარული პატრულირების შემოღება, რაც გულისხმობს, რომ პოლიციის მანქანები ამოსაცნობი ნიშნების გარეშე, მაგალითად, მიკროავტობუსის ფორმით, წინასწარ განსაზღვრული მარშრუტით იმოძრავებენ, ავტომატურად რეალურ დროში დააფიქსირებენ დარღვევებს და მძღოლთან კონტაქტის გარეშე მოხდება დამრღვევი პირების გამოვლენა და დაჯარიმება ვიდეოჯარიმების რეჟიმში", - განაცხადა ხუციშვილმა.

მისივე თქმით, ასევე იგეგმება გადასატანი რადარების შემოღება, რადგან დღეს წინასწარ ცნობილია, თუ სად დგას რადარი და მძღოლი ცდილობს ფრთხილად იყოს: „სხვადასხვა დროს ეს რადარები სხვადასხვა ადგილას იქნება განთავსებული ჩვენ ვფიქრობთ, რომ ორივე მექანიზმი, რომელიც სიახლეა, გააძლიერებს, ერთი მხრივ, პოლიციის შესაძლებლობებს, რომ გზა გააკონტროლონ და მეორე მხრივ, მძღოლებს გაუჩენს განცდას, რომ რეალურად კონტროლი ხორციელდება იქ, სადაც საპატრულო პოლიციის ციმციმები არ ჩანს".

შეგახსენებთ, საქართველოს შინაგან საქმეთა სამინისტრო საგზაო მოძრაობის უსაფრთხოების პროგრამას იწყებს, რომლის ფარგლებში არაერთი ცვლილებაა დაგეგმილი.

მაგალითად,
2016 წლის მარტიდან აიკრძალება მარჯვენასაჭიანი ავტომობილების რეგისტრაცია;
მართვის მოწმობის აღებისთვის საჭირო გამოცდის გავლა მოქალაქეებს შეიძლება ავტომანქანების რეალურ მოძრაობაში მოუწიოთ;
მართვის მოწმობას ქულა მიენიჭება და მისი მოქმედების ვადა პატრულის მიერ გამოწერილ ჯარიმებზე იქნება დამოკიდებული, ყველა ჯარიმა გარკვეული ერთეულით შეამცირებს ქულებს.
იცვლება ჯარიმების ოდენობა სხვადასხვა დარღვევებზე, როგორიცაა არასწორი მანევრირება, სიჩქარის გადაჭარბება, ალკოჰოლის ზემოქმედების ქვეშ მართვა და სხვა;
სასწრაფოს, სახანძროსა და პოლიციის მანქანისთვის გზის არდათმობა შესაძლოა 300 ლარით დაჯარიმდეს;
ასევე, დაგეგმილია სამგზავრო ავტობუსების მოძრაობაზე კონტროლის გაუმჯობესება;
ქვეყანაში არსებული ავტოპარკის განახლების წახალისება;
ფეხით მოსიარულეთა უსაფრთხოებისთვის კანონმდებლობის გამკაცრება.

[ნინო ნარიმანიშვილი, ახალციხე]