პარლამენტი 'საგზაო მოძრაობის შესახებ' კანონში დაგეგმილი ცვლილებების განხილვებს უბრუნდება

საკანონმდებლო პაკეტს დღეს, 20 თებერვალს, იურიდიულ საკითხთა კომიტეტის სხდომაზე განიხილავენ. მომხსენებელი შინაგან საქმეთა მინისტრის მოადგილე შალვა ხუციშვილი იქნება.

საკანონმდებლო პაკეტი იმ პროგრამის ნაწილია, რომელიც საქართველოს შინაგან საქმეთა სამინისტრომ ერთი წლის წინ შეიმუშავა.

პროგრამა მოიცავს შემდეგ კომპონენტებს: ავტოსაგზაო შემთხვევების მთავარი მიზეზების წინააღმდეგ (არასწორი მანევრირება, სიჩქარის გადაჭარბება, ალკოჰოლის ზემოქმედების ქვეშ მართვა და სხვა) ადმინისტრირების გაუმჯობესება; სამგზავრო ავტობუსების მოძრაობაზე კონტროლის გაუმჯობესება; ქვეყანაში არსებული ავტოპარკის განახლების წახალისება; სიჩქარის მობილური დეტექტორების გამოყენება, ე.წ. „უკონტაქტო პატრულირება“; გზებზე და ქალაქებში არსებული „შავი წერტილების“ განეიტრალება; ფეხით მოსიარულეთა უსაფრთხოებისთვის კანონმდებლობის გამკაცრება; მოძრაობის წესების დარღვევებზე ქულების სისტემის შემოტანა და მართვის მოწმობის ტესტის რეალურ მოძრაობაში გადატანა.

ახალი წესების თანახმად, მართვის მოწმობას ქულები ენიჭება და ვადიანი ხდება. მოძრაობის წესის დარღვევისთვის მძღოლები ფულადი ჯარიმითაც დაჯარიმდებიან და გარკვეული რაოდენობის ქულასაც დაკარგავენ.

კანონში დაგეგმილი ცვლილება ითვალისწინებდა მარჯვენასაჭიანი და საჭეგადატანილი მანქანების რეგისტრაციის აკრძალვას, თუმცა კანონპროექტთა პაკეტიდან შინაგან საქმეთა სამინისტრომ აღნიშნული მუხლი ამოიღო.

აღნიშნული საკანონმდებლო პაკეტი მთავრობამ პარლამენტს ჯერ კიდევ 2015 წელს წარუდგინა. განხილვის პროცესი კომიტეტებში გაიმართა. შედგა რამდენიმე სამუშაო შეხვდა, თუმცა მთელ რიგ საკითხზე აზრთა სხავადასხვაობის გამო პროცესი წინ აღარ წასულა.





[sknews.ge]