ახალციხის მუნიციპალიტეტში გამგებელი იცვლება

ყოფილმა გამგებელმა გელა დემეტრაძემ, რომელსაც გამგებლის პოსტი 2011 ელის 12 აპრილიდან უკავია, გადადგომის შესახებ განცხადება, ხუთშაბათს, 22 ნოემბერს დაწერა.

გამგებლის პოსტზე კონკურსი არ გამოცხადებულა. ახალციხის მუნიციპალიტეტის საკრებულოს თავმჯდომარე ოლეგ სანდროშვილი ამ ფაქტს დროის უკმარისობით ხსნის.

ადგილობრივი თვითმმართველობის შესახებ კანონის 39-ე მუხლის
მე-2 პუნქტის შესაბამისად, საკრებულოს ბიურომ გამგებლის ვაკანტურ თანამდებობაზე განცხადებები ვაკანსიის წარმოშობიდან 14 კალენდარული დღის განმავლობაში უნდა მიიღოს.

- ”ადგილობრივი ბიუჯეტი შემოტანილია, დღე-დღეზე განსახილველია და აქედან გამომდინარე, მიუღებელი იყო კონკურსის გამოცხადება. დრო აღარ გვაქვს, დროებით, მოვალეობის შემსრულებლად დავნიშნავთ”, - აცხადებს ოლეგ სანდროშვილი.

საკრებულოს ბიუროში გამგებლის პოზიციაზე დღეს, 14:00 საათის მონაცემებით, ექვსი განცხადებაა შესული: ბესიკ ბლიაძის, თამარ გოგოლაძის, ჯიმშერ გოგოლაურის, იოსებ მარტინენკოსი, დავით სამსონიძის და ზაზა ხუციშვილის.

ამათგან, თამარ გოგოლაძის გარდა, (რომელიც წარმოშობით თბილისელია და ახალციხეს საქმიანობით უკავშირდება) ყველა ადგილობრივია. ვინ დაიკავებს გამგებლის პოსტს და არის თუ არა ამ სიაში მომავალი გამგებელი, საკრებულოს თავმჯდომარე არ ამხელს: ”დაელოდეთ მოვლენების განვითარებას”.

სამცხე-ჯავახეთის ექვსი მუნიციპალიტეტიდან ახალციხე მეორე მუნიციპალიტეტია, სადაც საპარლამენტო არჩევნების შემდგომ საკადრო ცვლილებები მიმდინარეობს. 9 ნოემბერს საკრებულოს თავმჯდომარე შეიცვალა, გამგებლის დანიშვნა რიგით მეორე საკადრო ცვლილება იქნება.

[ნინო ნარიმანიშვილი, ახალციხე]