ახალქალქში გამგებლის პოსტზე ერთი კანდიდატი დარჩა

9 წევრისგან შემდგარმა კომისიამ, რეინტეგრაციის საკითხებში სახელმწიფო მინისტრის წარმომადგენელს სამცხე-ჯავახეთში, ედუარდ
აღასარიანს ყველაზე მაღალი, 5 შესაძლო ქულიდან, 4,3 ქულა მიანიჭა.

კონკურსის შედეგების გასაჩივრება გამგებლობის დანარჩენ პრეტენდენტებს 2 დღის ვადაში შეუძლიათ. აღასარიანს კი თანამდებობაზე დამტკიცებამდე წინ საკრებულოს სხდომა ელოდება. იმ შემთხვევაში, თუ იგი დეპუტატების მხარდაჭერასაც მოიპოვებს, ჯერი საკრებულოს თავმჯდომარის გადაწყვეტილებაზე დადგება.

შეგახსენებთ, ადგილობრივი თვითმმართველობის შესახებ კანონის 39-ე მუხლის პირველი პუნქტის შესაბამისად, მუნიციპალიტეტის გამგებელს ირჩევს საკრებულო სიითი შემადგენლობის უმრავლესობით, თავისი უფლებამოსილების ვადით. ამავე კანონის, მეორე პუნქტის თანახმად, გამგებლის კანდიდატურა კონკურსის წესით ირჩევა. გამგებლის თანამდებობაზე ვაკანსიის წარმოშობიდან 14 კალენდარული დღის განმავლობაში საკრებულოს ბიურო იღებს განცხადებებს. ბიურო მიღებული განცხადებებიდან არჩევს კვალიფიციურ კანდიდატებს და წარუდგენს საკრებულოს. გამგებელი არჩეულად ჩაითვლება, თუ მის კანდიდატურას მხარი დაუჭირა საკრებულოს სიითი შემადგენლობის ნახევარზე მეტმა.

აქვე შეგახსენებთ, ახალქალაქის მუნიციპალიტეტის გამგებელმა ნაირი ირიციანმა თანამდებობა 24 ივნისს, პირადი განცხადების საფუძველზე დატოვა და მოტივად, დაღლილობა დაასახელა. ვიდრე გამგებლის პოსტს დატოვებდა, ირიციანი "ნაციონალებიდან" "ქართულ ოცნებაში" გადავიდა და "სამხრეთის კარიბჭეს" მასზე წლების განმავლობაში მიმდინარე ზეწოლებზე ესაუბრა.

აქვე შეგახსენებთ, რომ მას შემდეგ რაც პოსტი ვაკანტური გახდა, "ქართული ოცნების" აქტივისტები ახალქალაქში მიმდინარე უსამართლო პროცესებზე ალაპარაკდნენ. ისინი აცხადებდნენ, რომ გამგებლის კანდიდატურას თბილისში არჩევენ, რაც მათთვის მიუღებელია. სამართლიანობის აღდგენის მოთხოვნით, 13 ივლისს მათ ახალქალაქში აქციაც გამართეს. ახალქალაქის მუნიციპალიტეტის გამგებლის ვაკანტურ პოსტზე 27 განაცხადი შევიდა. ამათგან, მეორე ტურში 6 კანდიდატი გადავიდა. კანდიდატებთან გასაუბრებები დღეს დილიდან დაიწყო. დილიდან საკრებულოს შენობასთან მობილიზებული იყო პოლიციაც.

ადგილობრივები აცხადებენ, რომ ახალი გამგებელი პირველ რიგში ადგილობრივების პრობლემებს უნდა იცნობდეს კარგად.

[Sknews.ge]