ვინ იმღერებს ახალციხეში 31 დეკემბრის ღამეს

საახალწლო კონცერტი ახალციხეში 31 დეკემბერს 21:00 საათიდან დაიწყება და 00:00 საათზე ფეიერვერკით დასრულდება. საქართველოს კულტურის სამინისტროში განმარტავენ, რომ ადგილობრივი მაყურებლისთვის ახალი წლის ღამეს ტრიო „სიმი“, „თბილისური კვარტეტი“, კახა კუხიანიძე, ნუკრი კაპანაძე, ნატო გელაშვილი და სხვა შემსრულებლები იმღერებენ.

კულტურის სამინისტრო საახალწლო ღონისძიებებს ორგანიზებას საქართველოს მასშტაბით ათ თვითმმართველ ქალაქში უწევს. სამინისტროს პრესსამსახურის წარმომადგენლი ქეთი ებანოიძის განმარტებით, რომელ ქალაქში რომელი მუსიკოსის ჩასვლა სურდათ, ამის შესახებ რეგიონებიდან მოთხოვნები მიიღეს.

„ჩვენ ვეცადეთ გაგვეთვალისწინებინა რეგიონების მოთხოვნები, რომელიც არ იყო დაკავებული ახალი წლის ღამეს და შესაძლებელი იყო მათი ამ ქალაქში ჩასვლა, ის გავუშვით, ხუთი შემსრულებელი უკვე ზუსტად ვიცით, რომ ახალციხეში ჩავლენ, თუმცა სავარაუდოდ ეს რიცხვი რვამდე გაიზრდება“, – ამბობს ქეთი ებანოიძე.

მისივე განმარტებით, რა თანხას დახარჯავს კულტურის სამინისტრო ახალი წლის ღამის კონცერტისთვის ამის გაგება მხოლოდ წერილობითი მოთხოვნის შემდეგ შეგვეძლება.

[თამარ თოთაძე, ახალციხე]