სამცხე-ჯავახეთში საახალწლო ღონისძიებებისთვის 145 748 ლარი იხარჯება

რეგიონის ექვსივე მუნიციპალიტეტში, საახალწლოდ მორთეს ქუჩები და დაგეგმეს კონცერტები. ექვსიდან ოთხ მუნიციპალიტეტში ახალი წლის ღამეს წარმოდგენას ადგილობრივი ფოლკლორული და ქოეოგრაფიული ანსამბლები გამართავენ, ახალციხესა და ბორჯომში კი გაცილებით მასშტაბური ღონისძიებებია დაგეგმილი.

ადიგენში ტენდერში გამარჯვებულმა ფირმამ 3 083 ლარით უკვე არსებული ხის სცენა უნდა დაამონტაჟოს, ქალაქის ცენტრალური ქუჩები საახალწლო განათებებით მორთოს და ფოიერკევკები შეიძინოს. ადიგენში საახალწლო კონცერტში ადგილობრივი ქორეოგრაფიული და ვოკალური ანსამბლები მიიღებენ მონაწილეობას.

წელს განსხვავებული მზადებაა ახალციხის მუნიციპალიტეტში, აქ საახალწლო ღონისძიებები ქალაქის ცენტრალურ პარკში რამდენიმე დღეა მიმდინარეობს. საახალწლო აქსესუარებით მოირთო ცენტრალური ქუჩები. ახალი წლის ღამეს ახალციხეში სოფო ხალვაში იმღერებს.

ახალციხე საახალწლო ღონისძიებებისთვის 20 390 ლარს დახარჯავს. გარდა ამ თანხისა, 8 000 ლარია გათვალისწინებული საახალწლო ტკბილეულისთვის, რომელიც მუნიციპალიტეტში მცხოვრებ პატარებს დაურიგდებათ.

9 000 ლარი დაიხარჯა საახალწლო განათებისა და ფოიერვერკების შესაძენად ასპინძაში. 31 დეკემბერს კონცერტი ადგილობრივი შემსრულებლების მონაწილეობით გაიმართება.

ნინოწმინდა საახალწლო ღონისძიებებში 6 700 ლარს ხარჯავს. მუნიციპალიტეტმა საახალწლო სამზადისი დაასრულა. უკვე მორთულია ქუჩები და ნაძვის ხე. ნინოწმინდაში საახალწლო კონცერტი 31 დეკემბერს, საღამოს 18:00 საათიდან დაიწყება და 23:00 საათზე ფოირვერკით დასრულდება. ღონისძიებაში მონაწილეობას ადგილობრივი ცეკვისა და სიმღერის ანსამბლები მიიღებენ.

ახალქალაქში საახალწლო ღონისძიებებისთვის წელს 21.831 ლარი იხარჯება. მორთეს კულტურის სახლისა და ცენტრალური პარკის მიმდებარე ტერიტორია და დადგეს 10–მეტრიანი ნაძვის ხე. ახალქალაქში კონცერტში მონაწილეობას ადგილობრივი ანსამბლები მიიღებენ.

რეგიონის მასშტაბით საახალწლო ღონისძიებებისთვის ყველაზე მეტს, 83.744 ლარს, ბორჯომის მუნიციპალიტეტის მერია ხარჯავს. ბორჯომის მუნიციპალიტეტში საახალწლო ღონისძიებები, როგორც ქალაქ ბორჯომში, ასევე დაბა ბაკურიანში გაიმართება. 31 დეკემბერს გალა–კონცერტი ბორჯომში 19:00 საათზე, ხოლო დაბა ბაკურიანში 22:00 საათზე დაიწყება. მასში მონაწილეობას მოწვეული შემსრულებლები დავით არჩვაძე, ჯგუფი "რეზო და ბავშვები" და ჯგუფი TDG მიიღებენ.

[თინათინ ზაზაძე, სამცხე–ჯავახეთი]