ახალციხის სკოლები ზამთარს მომზადებული შეხვდნენ

ახალციხის მესამე საჯარო სკოლაში ცენტრალური გათბობით თბებიან.

„როგორც ყველა სკოლაში ისე ჩვენთანაც გათბობის სისტემა 2006 წელს დამონტაჟდა, იმავე წელს სისტემას ტუმბო გაუფუჭდა, თუმცა გამგეობის დახმარებით სკოლაში გათბობა ისევ გვაქვს“, - ამბობს მესამე საჯარო სკოლის დირექტორი სვეტა არუთუნიანი.

თუმცა, არ არის გამორიცხული სკოლის გათბობის სისტემას პრობლემები ისევ შეექმნას.

„შარშან ანტიფრიზი სკოლის ბიუჯეტიდან, 1700 ლარად ვიყიდეთ, წელს კი ამის საშუალება ნამდვილად არ გვაქვს, სულ ცოტა 100 ლიტრი მაინც გვჭირდება. ყინვები უკვე დაიწყო და ძალიან გვეშინია გათბობის სისტემა ისევ არ დაზიანდეს“,- ამბობს სკოლის დირექტორი.

მესამე საჯარო სკოლაში გათბობა დილის 06:00 საათზე ირთვება და საჭიროების შემთხვევაში 14:00 საათამდე მუშაობს. აქ ცენტრალური გათბობა შეშით მუშაობს, სკოლას საწვავის პრობლემაც აქვს.

„შეშის ფული, ნაწილი, განათლების სამინისტრომ მოგვცა. დაგვპირდნენ, რომ დანარჩენს თებერვალში ჩაგვირიცხავენ. თუ ასე არ მოხდა საწვავი არ გვეყოფა და სკოლის ბიუჯეტიდანაც ვერ ვიყიდით“, - გვეუბნება დირექტორი.

ცენტრალური გათბობით თბება მეექვსე საჯარო სკოლაც. როგორც სკოლის დირექტორი ზაზა თამარაშვილი ამბობს, სისტემის დამონტაჟების დღიდან დღემდე ცენტრალური გათბობა უპრობლემოდ მუშაობს: „თავიდანვე ცოტა რაღაცეები გადავაკეთეთ, ყოველ წელს მაქსიმალურად ვცდილობთ, რომ გათბობის სისტემა ზამთრის დადგომამადე წესრიგში იყოს. მთელ შენობაში თანაბარი ტემპერატურაა“.

გათბობის პრობლემა არც მეხუთე საჯარო სკოლას აქვს. 2006 წელს დამონტაჟებული გათბობის სისტემა ძველებურად მუშაობს და სამივე კორპუსი თანაბრად თბება. სკოლამ გათბობისთვის 120 კუბური მეტრი შეშა უკვე შეიძინა.

„როგორც ყოველ წელს, წელსაც 120 კუბამეტრ შეშის შეძენაზე ტენდერი გამოვაცხადეთ. საწყისი ფასი 9 600 ლარი იყო, თუმცა აღმოჩნდა, რომ ტენდერი ჩვენთვის სასრგებლოდ გადაწყდა იმ კუთხით, რომ იგივე ოდენობის შეშა 7 200 ლარად შევიძინეთ“, - ამბობს მეხუთე საჯარო სკოლის დირექტორის მოვალოების შემსრულებელი ნანა დათაშვილი.

დღეიდან, 24 დეკემბრიდან, სასკოლო არდადეგები დაიწყო. სასწავლო პროეცესი 20 იანვარს გაგრძელდება.

[მანანა სარაშვილი, ახალციხე]