რითი გათბებიან ამ ზამთარს ახალციხელები [Photo, Video]

ფარნავაზ მეფის ქუჩაზე მცხოვრებმა აღაჯანიანიანებმა წელს ისევ შეშის ღუმელი დადგეს. მართალია სახლში გაზი შეიყვანეს, მაგრამ ერთი გამათბობლით სახლს ვერ გაათბობენ, ცენტრალური გათბობის დასამონტაჟებლად კი სახსრები ვერ გამონახეს.

”ზამთრის გატანა შეშით დაახლოებით 750 ლარი გვიჯდება. გაზით ვერ ვთბებით, ერთ ოთახში რომ დავამონტაჟო, ვერ გაათბობს მთელ სახლს, ორ ოთახში დამონტაჟება დიდ ხარჯებთან არის დაკავშირებული”, - გვეუბნება გრიგორ აღაჯანიანი.



რუსთაველის ქუჩაზე მცხოვრები ბეჟან კაჭკაჭაშვილი ამბობს, რომ გამოსაზამთრებლად 600 ლარის შეშა სჭირდება. გაზის შეყვანის სახსრები არც კაჭკაჭაშვილებს აქვთ: ”ნორმალურად რომ გათბეს სახლი, 600 ლარის შეშა მჭირდება. მე კი წელს 400 ლარის შეშა ვიყიდე და ღუმელს მხოლოდ საღამოობით ვანთებ”.

შეშის ღუმელებით თბებიან ნაქირავებ ბინებში მცხოვრები სტუდენტებიც.

”წელსაც, ტრადიციულად, შეშით ვთბებით. მეოთხე წელია სტუდენტი ვარ და სტუდენტების უმეტესობას, ნაქირავებ ბინებში, გაზი არ გვაქვს. შეშის ყიდვა და ჩამოტანაც ძალიან ძვირი გვიჯდება”, - ამბობს 9 აპრილის ქუჩაზე მცხოვრები მარიამ ზარია.



მათგან განსხვავებით სახლს გაზის გამათბობლებით ათბობენ ცხრა აპრილზე მცხოვრები მაისურაძეები. დიასახლისი ამბობს, რომ ასე სახლშიც სისუფთავესაც ადვილად იცავს და არც ისე ძვირი უჯდებათ.

”თვეში 120 ლარი მოგვდის გაზის გადასახადი, ამ თანხაში შედის გათბობაც, ქურაც, აბაზანის თერმექსიც. კმაყოფილები ვართ. არც დამონტაჟება დაგვიჯდა ძვირი, 130 ლარი გადავიხადე. გაზის შეყვანაში კი თავიდან 200 ლარი შევიტანე და მერე ნაწილ-ნაწილ დავფარე”, - ამბობს ლია მაისურაძე.



მეორე ზამთარია გაზით თბებიან ხაშურის ქუჩაზე მცხოვრები ერანოვებიც.

”ორი წელია, რაც გაზი მაქვს შეყვანილი და ძალიან კმაყოფილი ვარ. სულ 450 ლარი დამიჯდა. გადასახადს კი თევში 120 ლარამდე ვიხდი”, - გვეუბენბა სუჯან ერანოვი.

არიან ისეთებიც, ვინც უკვე დაგეგმა გაზის გამათბობლის დამონტაჯება.

’წელს გარკვეული მიზეზების გამო ვარ შევიყვანეთ გაზი, მომავალ წელს აუცილებლად ვაპირებთ. ახლა შეშით ვთბებით და 500 ლარი გვჭირდება”, - ამბობს 9 აპრილის ქუჩაზე მცხოვრები დავით კურტანიძე.

შპს ”ელ-ენ”-ის დირექტორი ვასილ აბულაძე ამბობს, რომ გაზზე მოთხოვნა გაზრდილია. ახალციხეში ბუნებრივი აირით 4850-მდე ფიზიკური პირი და 150-170-მდე იურიდიული პირი სარგებლობს.

მისივე თქმით, გაზის შეყვანა სახლში ფიზიკური პირებისთვის გაცილებით ნაკლები ღირს, ვიდრე იურიდიული პირებისთვის: ”ფიზიკური პირებისთვის საავანსო ღირებულება 200 ლარს შეადგენს. სრული მომსახურება საშუალოდ 400 ლარამდე ჯდება. იურიდიულ პირებს ეს ყველაფერი 10-ჯერ მეტი უჯდებათ. მიახლოვებით 500-დან 1000 ლარამდე მხოლად შეჭრა [ცენტრალურ მილზე დაერთება]ღირს”.



ელექტროპროდუქციის მაღაზიებში ამბობენ, რომ გასულ წელთან შედარებით წელს გაზის გამათბობლებზე მოთხოვნა გაიზარდა.

”შარშან ვინც გამოსცადა, ყველა კმაყოფილია, ამიტომ, წელს მოთხოვნა გაიზარდა”, - გვეუბენბა შპს ”ელეფანთის” უფროსი ვლადიმერ გრიგორიანი.

იგივეს გვეუბნება ”ელიტ ელექტრონიქსის” მეპატრონე დავით ჭალიძეც: ” წელს, შემიძლია ვთქვა, რომ ისე მოიმატა რაოდენობამ, რომ 10 გამათბობლიდან 8 უცებ იყიდება”.



[ნუკა სტეფნაძე, ახალციხე]