ახალციხელ ახალგაზრდებთან ქალთა უფლებებზე შეხვედრა გაიმართა

დისკუსიას, რომელიც საათზე მეტ ხანს გაგრძელდა, ახალციხის ქალთა ოთახის მენეჯერი ნინო რუხაძე უძღვებოდა. მან ახალციხელ ახალგაზრდებთან ქალთა განათლებაზე, თანასწორუფლებიანობაზე, ოჯახში მათი განათლების მიღებისას გადაწყვეტილებების მიღებაზე, სამსახურში დასაქმებისას მამაკაცების უპირატესობასა და მემკვიდრეობის საკითხებზე ისაუბრა.

„ქალი ჩლუნგდება მხოლოდ სამსაზარეულოში ტრიალით. მე ვერ ავიტან ქალი რომ სულ სახლში იყოს“, – თქვა შეხვედრის ერთ–ერთმა მონაწილემ თორნიკე პარუნაშვილმა.

მას მიაჩნია, რომ თუ დღეს ქვეყანაში ქალთა უფლებები უფრო მეტად ირღვევა, ვიდრე მამაკაცების, ეს ქალების ნაკლები განათლების ბრალია: „ქალებს არ აქვთ ამაღლებული ცნობიერების დონე, ამიტომ ვერაფერს ეტყვი კაცებს, რატომ სცემთ ქალებსო. მაგრამ რადიკალ ფემინისტებს ვერ ვიტან, რომ ამბობენ არ გათხოვდეთ, გათხოვება კაცის მსახურებააო“.

ნინო რუხაძის თქმით, ქალთა უფლებებთან დაკავშირებით, ახალგაზრდებში ცნობიერების დონე ბევრად უფრო მაღალია, ვიდრე უფროსი ასაკის როგორც ქალებში, ასევე მამაკაცებში.

„ახალგაზრდებს, უნივერსიტეტებსა და სკოლებში მიღებული სამოქალაქო განათლების შედეგი ეტყობათ. შედარებით უფროსები მსჯელობისას ამბობენ, რომ ქალი და მამაკაცი თანასწორი უნდა იყოს, თუცა მათ საუბარში ყოველთვის ჩნდება სიტყვა მაგრამ, რაშიც ის იგულისხმება, რომ რეალურად ცხოვრებაში თვითონ სხვაგვარად იქცევიან“, – ამბობს ნინო რუხაძე.

შეხვედრა ახალციხის დემოკრატიული ჩართულობის ცენტრის ორგანიზებით ქალთა თვესთან, მარტთან დაკავშირებით გაიმართა.

[თამუნა უჩიძე, ახალციხე]