რას ჰპირდება ახალციხის მერია სტიპენდიანტების მეორე ნაკადს

დღეს, 15 დეკემბერს, ახალციხის მერიაში შედგა. ახალციხის მერმა სტუდენტებთან ქალაქში განხორციელებულ და ასევე, მომავალ, 2016 წელს დაგეგმილ პროექტებზე ისაუბრა. გიორგი კოპაძემ სტუდენტებს გააქტიურებისკენ მოუწოდა.

„ძალიან ბევრი ღონისძიება იგეგმება 2016 წელს, ჩვენ უნდა ვითანამშრომლოთ. თქვენ მერის სტიპენდიანტები ხართ და მინდა, რომ პირველები იყოთ“, – განაცხადა სტუდენტებთან შეხვედრისას გიორგი კოპაძემ.

ახალციხის მერიამ ყოველთვიური სტიპენდია, 100 ლარის ოდენობით, სამცხე–ჯავახეთის უნივერსიტეტისა და კოლეჯ „ოპიზარის“ რვა წარჩინებულ სტუდენტს დაუნიშნა. სტუდენტებს დაჰპირდნენ, რომ სტიპენდიას ერთი სემესტრის, 5 თვის განმავლობაში ჩაურიცხავენ.

„ეს სტიპენდია გაგრძელდება სულ. მე ჯერ წასვლას არსად ვაპირებ, თუმცა როდესაც წავალ და სხვა მერი იქნებ, ალბათ ისიც გააგრძელებს სტიპენდიის მიცემას. ეს მნიშვნელოვანია იმისთვის, რომ ქალაქში განათლებული ხალხი გვყავდეს“, – განაცხადა გიორგი კოპაძემ.

„ძალიან სასიამოვნო შეხვედრა იყო, ორმაგად საპასუხისმგებლოა მერიის სტიპენდიანტობა“, – ამბობს სტუდენტი მარი ნარიმანიძე.

მერიის თანამშრომლებისა და სტუდენტების შეხვედრა ერთ საათს გაგრძელდა. ქალაქის მერი, გიორგი კოპაძე მსგავს სახის შეხვედრებს მომავალშიც გეგმავს.

შეგახსენებთ, ახალციხის მერიამ სტიპენდიის გაცემა მიმდინარე წლის ზაფხულიდან დაიწყო. პირველ ნაკადშიც 8 სტუდენტი მოხვდა. მერია მათ ერთი სემესტრის სტიპენდიას დაჰპირდა, თუმცა, მხოლოდ ორი თვის ჩაურიცხა, მაისისა და ივნისის. მერიაში მომხდარი იმით ახსნეს, რომ ივნისში სემესტრი დასრულდა. პირველი ნაკადის სტუდენტებმა კი, მერიის სტიპენდიის დანიშვნით, უნივერსიტეტის სტიპენდია დაკარგეს და საბოლოოდ, დამსახურებული ჯილდოს გარეშე დარჩნენ.

[ვარლამ წიკლაური, ახალციხე]