ახალციხის მერიის სტიპენდიას 14 სტუდენტი მიიღებს

ახალციხის მუნიციპალიტეტის მერია სტიპენდიანტებს „შემოდგომის ფესტივალზე“ ერთჯერადად 500-500 ლარითა და სერტიფიკატებით დააჯილდოვებს.

მერიის სტიპენდიის მისაღებად, აუცილებელია სტუდენტს ყველა საგანში შეფასება 95 ქულაზე მეტი ჰქონდეს და ახალციხის მუნციპალიტეტის მცხოვრები იყოს.

გარდა მერიის სახელობითი სტიპენდიისა, უნივერსიტეტში ამ დროისთვის არსებობს სახელმწიფო სტიპენდიაც, რომელიც ერთი სემესტრის განმავლობაში 750 ლარს შეადგენს და მას განათლების, მეცნიერების, კულტურისა და სპორტის სამინისტრო გასცემს.

სამცხე–ჯავახეთის სახელმწიფო უნივერსიტეტი კი თავადაც ნიშნავს აკადემიურ სტიპენდიას 250 ლარის ოდენობით.

უნივერსიტეტის ადმინისტრაციის ინფორმაციით, 2019-2020 სასწავლო წლიდან შესაძლოა გრიგოლ ხანძთელის სტიპენდიაც აღდგეს, რომელიც პრეზიდენტის ფონდის გაუქმების შემდეგ, აღარ გაიცემა.

[თორნიკე ზაზაძე, ახალციხე]