ახალციხელ წარჩინებულ სტუდენტებს მერია სემესტრში 500 ლარიან სტიპენდიას მისცემს

მთავარი → სიახლე, ეკონომიკა, განათლება 20.02.2019

ახალციხის მერია სამცხე–ჯავახეთის სახელმწიფო უნივერსიტეტის იმ სტუდენტებს, რომლებსაც ყველა საგანში 95 და მეტი ქულა ექნებათ, სტიპენდიას ჩაურიცხავს.

ახალციხელ წარჩინებულ სტუდენტებს მერია სემესტრში 500 ლარიან სტიპენდიას მისცემს

ფოტო: არქივი. 2018 წელი.

ახალციხის საკრებულოში ახალგაზრდულ საქმეთა კომისიის თავმჯდომარე ამბარცუმ ბაბოიანი ამბობს, რომ სტიპენდიას მიიღებს ყველა სტუდენტი, ვისაც მაღალი ქულები ექნება. მისი თქმით, წარჩინებული სტუდენტების რაოდენობა განსაზღვრული არ არის: "აქამდე სტიპენტიას იღებდნენ ის სტუდენტები, რომლებსაც წლის განმავლობაში საშუალო არითმეტიკულით 95 ქულა და მეტი გამოსდიოდათ. ახლა თოთოეულ საგანზეა გამახვილებული ყურადღება. ერთ სემესტრში 500 ლარს მიიღებს სტუდენტი, რომელსაც თითოეულ საგანში 95 და მეტი ქულა ექნება".

წარჩინებული სტუდენტების წასახალისებლად, სტიპენდიის გაცემის წესი ახალციხის მუნიციპალიტეტის საკრებულომ 18 თებერვალს დაამტკიცა.

სტიპენდია ჩაერიცხებათ იმ სტუდენტებს, რომლებიც სამცხე–ჯავახეთის სახელმწიფო უნივერსიტეტში სწავლობენ და ბოლო ექვსი თვის განმავლობაში ახალციხის მუნიციპალიტეტში ცხოვრობენ. ამისთვის სტუდენტმა შესაბამისი ცნობა უნდა წარადგინოს.

გასულ წელს ახალციხის მუნიციპალიტეტის მერიამ სტიპენდია 10 წარმატებულ სტუდენტს გადასცა.

[თინათინ ზაზაძე, ახალციხე]