ახალციხესა და ასპინძაში გაზის მიწოდება ვადაზე ადრე აღდგა

კომპანიამ სარემონტო სამუშაოები ვადაზე ადრე დაასრულა და შესაბამისად, გაზის მიწოდებაც 15 დეკემბრის 15:00 საათის ნაცვლად, 14 დეკემბრის 16:00 საათიდან დაიწყო.

შპს „ინტერგაზის“ დირექტორის ვასილ აბულაძის განმარტებით, მარნეულში დროზე ადრე დაასრულეს სამუშაოები. გაზის მიწოდება შუადღედან დაიწყო და ეტაპობრივად, როგორც კი მილები გაივსო, გაზის მიწოდება ყველა აბონენტს აღუდგა.

შეგახსენებთ, რომ "საქართველოს გაზის ტრანსპორტირების კომპანიის" ინფორმაციით, მარნეულის განშტოებაზე ჩასატარებელი შეჭრითი სამუშაოების გამო, ქალაქ ახალციხეს, ვალეს, დაბა ასპინძას, სოფელ ხიზაბავრას და დამალას ბუნებრივი აირის მიწოდება 14 დეკემბრის 05:00 საათიდან შეუწყდა. აღნიშნული სამუშაოების გამო ბუნებრივი აირის გარეშე სამცხე–ჯავახეთში 7.200 აბონენტი იყო დარჩენილი.

გაზის მიწოდების შეწყვეტის გამო დღეს, 14 დეკემბერს, ქალაქ ახალციხის ბაღებში სწავლა შეწყვეტილი იყო, ქალაქის 7 სკოლიდან 4–ში კი გაკვეთილების ხანგრძლივობა იყო შემცირებული.

ხვალიდან სკილებიც და ბაღებიც მუშაოების ჩვეულ რეჟიმს უბრუნდებიან.

[ნინო ნარიმანიშვილი, ახალციხე]