ახალციხესა და ასპინძაში გაზის მიწოდება ერთ საათში აღდგება

დაანონსებული ორი დღის ნაცვლად, ახალციხეს ბუნებრივი აირის მიწოდება დაახლოებით ერთ საათში აღუდგება. მოსახლეობას გაზი დღეს, დილის 05:00 საათიდან არ მიეწოდება.

„მარნეულში დროზე ადრე დაასრულეს სამუშაოები. 15 წუთში გავუშვებთ გაზს. მილების გავსებას დაახლოებით ერთი საათი ან საათნახევარი დასჭირდება. დღის ბოლომდე ბუნებრივი აირი ყველა მოსახლეს ექნება“, – ამბობს შპს „ინტერგაზის“ დირექტორი ვასილ აბულაძე.

შეგახსენებთ, რომ "საქართველოს გაზის ტრანსპორტირების კომპანიის" ინფორმაციით, მარნეულის განშტოებაზე ჩასატარებელი შეჭრითი სამუშაოების გამო, ქალაქ ახალციხეს, ვალეს, დაბა ასპინძას, სოფელ ხიზაბავრას და დამალას ბუნებრივი აირის მიწოდება 14 დეკემბრის 05:00 საათიდან და 15 დეკემბერის 15:00 უნდა შეწყვეტოდა.

აღნიშნული სამუშაოების გამო ბუნებრივი აირის გარეშე სამცხე–ჯავახეთში 7.200 აბონენტი დარჩა.

ბუნებრივი აირის მიწოდების შეწყვეტის გამო ორი დღით სასწავლო პროცესი შეჩერდა ახალციხის რვა საბავშვო ბაღში. ხოლო ახალციხის შვიდი სკოლიდან ოთხში გაკვეთილების ხანგრძლივობა შემცირდება, 15 დეკემბერს სამ მათგანში გაკვეთილები არ უნდა ჩატარებულიყო. აღდგება თუ არა სასწავლო პროცესი იმ დაწესებულებებში, სადაც ბუნებრივი აირის მიწოდების შეწყვეტის გამო სწავლა დროებით შეჩერდა, "სამხრეთის კარიბჭე" არკვევს და ინფორმაციას მოგვიანებით მოგაწვდით.

[თინათინ ზაზაძე, ახალციხე]