ახალციხის სკოლებში სწავლა აღარ შეჩერდება

ახალციხის მეშვიდე საჯარო სკოლა. ფოტო "სამხრეთის კარიბჭეს" არქივიდან

ვინაიდან, ბუნბრივი გაზის მიწოდება ვადაზე ადრე აღდგა, ახალციხის სკოლებში შეზღუდვები მოიხსნა.

ქალაქის ოთხივე სკოლა, მეორე, მეოთხე, მეექვსე და მეშვიდე, ხვალ გაკვეთილების ხანგრძლივობას ისევ 45 წუთამდე გაზრდის. ცხადია, აღარ დაისვენებს ის სამი სკოლა, რომელიც გაზის არქონის გამო ხვალ სწავლის შეწყვეტას აპირებდა.

ახალციხეში გაზის მიწოდება შუადღეს აღდგა, მაშინ, როცა სასწავლო პროცესი უკვე დასრულებული იყო. სკოლების დირექტორები ამბობენ, რომ შეფერხების მოხსნის შესახებ მოსწავლეებს ინდივიდუალურად ატყობინებენ.

შეგახსენებთ, გუშინ, 05:00 საათიდან დღეს 16:00 საათამდე, ახალციხეს (და არამარტო ახალციხეს) გაზი არ მიეწოდებოდა. ბუნებრივი აირის მიწოდება სარემონტო სამუშაოების გამო შეწყდა. "საქართველოს გაზის ტრანსპორტირების კომპანიამ" ოფიციალური ინფორმაცია გაავრცელა და აბონენტებს შეატყობინა, რომ გაზი 15 დეკემბრის 15:00 საათამდე არ იქნებოდა. თუმცა, ვინაიდან სამუშაოები ვადაზე ადრე დასრულდა, ბუნებრივი აირის მიწოდებაც დაგეგმილზე ადრე აღდგა.

[sknews.ge]