შეზღუდვები ახალციხის სკოლებში – სად შეწყდება სწავლა

შეფერხებით მუშაობა იმ სკოლებს უწევთ, სადაც გათბობა ბუნებრივ აირზე მუშაობს.

კონკრეტულად, ახალციხის მეორე, მეოთხე, მეექვსე და მეშვიდე სკოლებში, დღეს, 14 დეკემბერს, გაკვეთილების ხანგრძლივობა 45–დან 35 წუთამდე შეამცირეს. სკოლების ადმინისტრაციამ გადაწყვეტილება ბუნებრივი აირის გათიშვის გამო მიიღო.

ხვალ, 15 დეკემბერს კი, ამ ოთხი სკოლიდან სამში, მეორე, მეოთხე და მეშვიდე სკოლებში, სწავლა არ იქნება. დირექტორის, გია კაპანაძის განმარტებით, მეექვსე სკოლა ხვალ კლასების გათბობას ელექტროგამათბობლებით ეცდება.

განსაკუთრებული პრობლემის წინაშე მეშვიდე, სპეციალური საგანმანათლებლო საჭიროების მქონე სკოლა დგას. აქ მოსწავლეები ღამეც სკოლაში რჩებიან.

დირექტორის, ლალი კარკაძის თქმით, გაზის მიწოდების შეწყვეტის შესახებ არ იცოდნენ, შესაბამისად, მშობლები არ გაუფრთხილებიათ, დღეს გუშინდელი გათბობის ხარჯზე იმუშავებენ და საღამოს მოსწავლეებს სახლებში გაუშვებენ.

„ეს პანსიონია და ღამეც რჩებიან ბავშვები, სავარაუდოდ ვერავის დავიტოვებ, რომ არ გაცივდნენ“, – ამბობს სკოლის დირექტორი.

სამივე სკოლა გაცდენილი საათების რაოდენობას დასვენების დღეებში აანაზღაურებს.

შეგახსენებთ, სარემონტო სამუშაოების გამო 14 დეკემბრიის გამთენიისას 05:00 საათზე ახალციხეს, ვალეს, დაბა ასპინძას, სოფელ ხიზაბავრას და დამალას ბუნებრივი აირის მიწოდება შეუწყდა. "საქართველოს გაზის ტრანსპორტირების კომპანიაში" განმარტავენ, რომ მიზეზი მარნეულის განშტოებაზე ჩასატარებელი შეჭრითი სამუშაოებია. გაზის მიწოდება 15 დეკემბერს, 15:00 საათზე აღდგება.

გაზის მიწოდების შეწყვეტის გამო, სწავლა ორი დღით შეწყდა ქალაქ ახალციხის ბაღებშიც.

[თინათინ ზაზაძე, ახალციხე]