ბორჯომის მუნიციპალიტეტი საუკეთესო პრაქტიკის დანერგვისთვის დაჯილდოვდა

"ადგილობრივი თვითმმართველობა - საუკეთესო პრაქტიკა 2015"-ამ სახელწოდების კონკურსი საქართველოში წელს პირველად ჩატარდა. სპეციალურმა კომისიამ 70 მუნიციპალური ერთეულიდან 9 მუნიციპალიტეტის მიერ გატარებული 10 საუკეთესო პრაქტიკა შეარჩია.

სამცხე–ჯავახეთიდან გამარჯვებულებს შორის მხოლოდ ბორჯომის მუნიციპალიტეტი მოხვდა. ბორჯომიდან საუკეთესოდ ორი პროექტი აღიარეს. ესენია: "ბორჯომი – ინფო" და "მარკირებული ბილიკები". ორივე პროექტი მოსახლეობის საინფორმაციო უზრუნველყოფას გულისხმობს.

"ბორჯომი ინფო"-ს საშუალებით, მუნიციპალიტეტში მიმდინარე პროექტებისა და ღონისძიებების შესახებ, მოსახლეობისათვის მოკლე ტექსტური შეტყობინების გაგზავნის სისტემა დაინერგა."მარკირებული ბილიკები" კი
საფეხმავლო ტურიზმის განვითარებაზეა ორიენტირებული, ქალაქის ქუჩებსა და მის გარეუბანში საფეხმავლო ბილიკებს მარკირება გაუკეთეს.

"საინფორმაციო დაფები ჩამოსულ ტურისტს უადვილებს გადაადგილებას და ამ ინფორმაციის საშუალებით ახერხებს მოინახულოს ყველა მნიშვნელოვანი ადგილი ბორჯომში", – ამბობს ბორჯომის მუნიციპალიტეტის გამგებელი დიმიტრი ყიფიანი.

"დღეს ადგილობრივ თვითმმართველობებს აქვთ ყველა შესაძლებლობა, რომ ცენტრალური მთავრობისგან დამოუკიდებლად, ყოველგვარი ჩარევის გარეშე განახორციელონ ის პროექტები, რომლებიც თავად მიაჩნიათ სწორად. ამან მოგვცა შესაძლებლობა, რომ ადგილობრივმა თვითმმართველობებმა დანერგეს საუკეთესო პრაქტიკა", – აცხადებს საქართველოს პრემიერ–მინისტრი ირაკლი ღარიბაშვილი.

კონკურსი "ადგილობრივი თვითმმართველობა - საუკეთესო პრაქტიკა" ყოველ წელს ჩატარდება.

[თამარ თოთაძე, ახალციხე]