ბორჯომელი ნინო ქარდავა 'წლის საუკეთესო მუსიკის პედაგოგი' გახდა

დაჯილდოების საზეიმო ღონისძიება თბილისში დღეს, ორ მარტს გაიმართა.

„ძალიან კმაყოფილები ვბრუნდებით, ეს არის მასწავლებლის შრომის დაფასება. ეს პედაგოგი და წაღვერის საჯარო სკოლა იმსახურებს ამ წარმატებას", – აცხადებს ბორჯომის საგანმანათლებლო რესურსცენტრის ხელმძღვანელი იზოლდა ლომიძე.

ნინო ქარდავა წაღვერის საჯარო სკოლაში, მუსიკას 15 წელია ასწავლის.

„წელს პირველად ჩატარდა კონკურსი მუსიკის მასწავლებლებისთვის და მონაწილეობა მივიღე. პირველ ეტაპზე შევავსე კითხვარი, სადაც ჩავწერე, თუ როგორ ვუწევდი საგანს პოპულარიზაციას თემში. გაკვეთილზე დამესწრნენ, რომელიც ახალი სკოლის მოდელის მიხედვით ჩავატარე. ძალიან მოეწონათ ბავშვების ჩართულობა. ჩემი აზრით იმიტომ გამომარჩიეს, რომ 15 წელია მაქვს მოსწავლეების პორთფოლიო, საკონკურსო კომისიას მათი ნამუშავრები წარვუდგინე. ასევე ჩატარებული მაქვს საქართველოს დაკარგული ტერიტორიების: ლაზეთის, შავშეთის და ტაო–კლარჯეთის ფოლკლორის კვლევა", – ამბობს მუსიკის მასწავლებელი ნინო ქარდავა.

[sknews.ge]