მხატვრული კითხვის ოსტატი შალვა კეღოშვილი გარდაიცვალა

როგორც ოჯახის ახლობლები აცხადებენ, ბოლო წლებში შალვა კეღოშვილი ავადმყოფობდა, მან რამდენიმე ოპერაციაც გაიკეთა.
შალვა კეღოშვილს მეუღლე და ერთი შვილი ჰყავს. მისი მეუღლე ადიგენის სოციალური მომსახურების სააგენტოში მუშაობს, შვილი კი სტუდენტია.

თავად შალვა კეღოშვილი 2006 წლიდან ადიგენის მუნიციპალიტეტის გამგეობის კულტურის სამსახურში, კულტურისა და ძეგლთა დაცვის საკითხებში მთავარი სპეციალისტი იყო. სამსახური 2015 წლის მარტში დატოვა, მან საჯარო მოხელეთა შესარჩევი კონკურსი წარუმატებლად გაიარა.

ადიგენის მუნიციპალიტეტის გამგეობაში აცხადებენ, რომ შალვა კეღოშვილის ოჯახს 1000 ლარით დაეხმარებიან.

შალვა კეღოშვილს სამცხე–ჯავახეთი, და არამხოლოდ სამცხე–ჯავახეთი, მისი ლექსებით იცნობდა. იგი აღიარებულია საუკეთესო თამადად.

[ნინო ნარიმანიშვილი, ადიგენი]