პრემიერმა ვარძიის სარეაბილიტაციო სამუშაოები მოინახულა

პრემიერმა ისტორიული საჯინიბო, პირველი სატრაპეზო, ვარძიის სამრეკლო, ძეგლის მთავარი კარიბჭე, თამარის წყარო, ღვთისმშობლის მიძინების ტაძარი და მამათა მონასტერი დაათვალიერა.

„ათეული წლებია ვარძია არ იყო განათებული. ჩვენი ინიციატივით ვარძია გავანათეთ, რათა მეტი ტურისტის მოზიდვის ადგილი გახდეს; ბოლო ორი წელი ტურისტების რაოდენობა გაიზარდა, ახლა საჭიროა, რომ ძეგლის უნიკალურობა მეტად იქნას წარმოჩენილი“, - განაცხადა საქართველოს პრემიერ-მინისტრმა ვარძიაში სტუმრობისას.

პრემიერმა ვარძიის საველე შტაბში სამუშაო შეხვედრა გამართა და მიმდინარე სამუშაოების შესახებ ინფორმაცია მოისმინა. მისი განცხადებით, ვარძიის რეაბილიტაცია 3–4 წელიწადზეა გაწერილი.

ვარძიის გადარჩენის სახელმწიფო პროგრამის ფარგლებში მუშაობა რამდენიმე მიმართულებით ხორციელდება. დაგეგმილია საგანგებო სეისმო და მეტეო-სადგურების ქსელის ინსტალაცია, კლდის სრული დიაგნოსტიკა - სეისმო-ტომოგრაფიული და გეოფიზიკური კვლევა და თერმო გადაღებები.

გარდა ამისა, კვადროკოპტერის მეშვეობით ვარძიის სამგანზომილებიანი მოდელი შეიქმნება, სადაც ვარძიის მდგომარეობის სრული და დეტალური ინფორმაცია განთავსდება.

ვარძიის ქედზე ხორციელდება წყალამრიდი არხების აღდგენა-მშენებლობა, ხოლო 2015 წლის ბოლოს მზად იქნება ვარძიის კედლის მხატვრობის სრული კვლევითი-დიაგნოსტიკური დოკუმენტაცია.

ძეგლის ინფრასტრუქტურის სრული მოწესრიგებისთვის მიუვალ და სახიფათო უბნებზე კიბეებისა და მოაჯირების მონტაჟი და ტურისტული ბილიკების მოწესრიგება მიმდინარეობს.

ვარძიაში დამონტაჟდა განათების სისტემაც, რომელიც ჩაბნელებული ძეგლის სრულად განათებისა და ტურისტებისა და მომლოცველებისთვის ვარძიის ღამის საათებში მონახულების შესაძლებლობას იძლევა.

პროგრამის განსახორციელებლად გაერთიანებულია ქვეყნის სამეცნიერო და საერთაშორისო ინსტიტუტები, რომელსაც იუნესკოს ექსპერტი, კულტურული მემკვიდრეობის სფეროში საინჟინრო-გეოლოგიური მეცნიერებების დოქტორი, მეწყერების საერთაშორისო კონსორციუმის ვიცე-პრეზიდენტი კლაუდიო მარგოტინი ხელმძღვანელობს.

ვარძიის ფრესკების კვლევით სამუშაოებში ლონდონის კურტოს უნივერსიტეტისა და თბილისის სამხატვრო აკადემიის რესტვარაცია– კონსერვაციის ფაკულტეტის სტუდენტები მონაწილეობენ.

პრემიერ–მინისტრის ინიციატივით დაწყებული ვარძიის გადარჩენის პროექტის განსახორციელებლად, პირველი ეტაპისთვის, მთავრობამ უკვე გამოყო ნახევარ მილიონ ლარზე მეტი.



[ნინო ნარიმანიშვილი, ასპინძა]