ვარძიაში სარეაბილიტაციო სამუშაოები სრულდება [photo\video]

ვარძიის კომპლექსის გადარჩენის ოთხწლიანი პროექტი, რომელიც კულტურისა და ძეგლთა დაცვის სამინისტროს ინიციატივით მიმდინარეობს, წელს უნდა დამთავრდეს. ამ პერიოდში ჩატარდა არქეოლოგიური კვლევები, გასუფთავდა და დაემატა ახალი გამოქვაბულები. მათი რაოდენობა არსებული ქვაბულების დაახლოებით 20% –ს შეადგენს. კომპლექსის ზედა მხარეს, საიდანაც ქვათა ცვენის საშიშროება იყო, გაკეთდა დამცავი ბადეები. გამოქვაბულებში დამონტაჟდა განათება და მიმანიშნებელი დაფები. კომპლექსის მიმდებარე ტერიტორიაზე კი მოეწყო სველი წერტილები, დაიდგა ხის სკამები და წყლის ბიუეტები.

ახლა ვარძიაში კლდის გამაგრებითი სამუშაოები მიმდინარეობს, პარალელურად შენდება ვიზიტორთა ცენტრი და ფართოვდება საპარკინგე ადგილები.

„ბევრი უბანია ვარძიაში, რომელიც გადაუდებელ ჩარევას საჭიროებს. ამ ყველაფერთან ერთად, მიმდინარე წელს ხანძარსაწინააღმდეგო სისტემის დამონტაჟებასაც ვგეგმავთ“, – ამბობს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ანთიძე.

ფართომასშტაბიანი სამუშაოები ვარძიაში 2015 წელს დაიწყო. მანამდე კი კლდეში ნაკვეთ სამონასტრო კომპლექსს მულტიდისციპლინური კვლევები ჩაუტარდა, რაშიც ქართველ სპეციალისტებს იტალიელი ექსპერტი კლაუდიო მარგოტინი დაეხმარა.

„ძალიან ბევრი სირთულეები იყო ვარძიაში, კლდის გარკვეული ნაწილი იშლებოდა. გასასვლელი გვირაბი კვირაში შვიდი მილიმეტრით იწევდა დაბლა. ამინდის გაუარესებასთან ერთად საშიშროება იყო, რომ მთლიანად მოწყვეტილიყო. იტალიელი სპეციალისტის კონსულტაციით 48 ანკერით დავამაგრეთ ზედა ქანზე. ამ ქმედებამ სხვა ადგილების სტაბილიზაციაც გამოიწვია“, – გვიხსნის ანთიძე.

მისი თქმით, ოთხწლიანი სარეაბილიტაციო სამუშაოების შემდეგ, ვარძიის ზოგადი მდგომარეობა სტაბილურია: „შეიძლება ითქვას, რომ ძირითადი ინფრასტრუქტურული სამუშაოები დამთავრებულია“.

ანთიძის თქმით, ამ ეტაპზე სამონასტრო კომპლექსში ახალი ქვაბულების გასუფთავება აღარ იგეგმება: „ის რაც დავამატეთ არ არის ცოტა. სწორად დავგეგმეთ სამუშაოები თავიდანვე და ვიცით თუ რისი მოვლის შესაძლებლობა გვაქვს, დანარჩენი ქვაბულები ჯერ სჯობს, რომ ბუნებრივი კონსერვაციის პირობებში იყოს“.

2014 წლიდან დღემდე ვარძიის რეაბილიტაციისთვის დაახლოებით ოთხი მილიონი ლარი დაიხარჯა.

„2014 წელს სახელმწიფო ბიუჯეტიდან კვლევებისთვის ნახევარი მილიონი გამოიყო, 2015 წელს მილიონ ნახევარი. 2016–2018 წლებში კი, დაახლოებით, ორმილიონნახევარი ლარი ფონდ „ქართუმ“ დახარჯა. ამ თანხაში შედის ინფრასტრუქტურაც, წყალგაყვანილობაც, მხატვრობის კონსერვაციაც. შეიძლება ითქვას, რომ ვარძია გამართულად ფუნქციონირებს“.

კულტურული მემკვიდრეობის დაცვის ეროვნულ სააგენტოში აცხადებენ, რომ მომდევნო წლებში ვარძიის კომპლექსისთვის ამდენი თანხის გაღება საჭირო აღარ იქნება: „დამთვალიერებლებიდან შესული თანხით კომპლექსი თავის შენახვას და მოვლას შეძლებს. ვარძიას, ბუნებრივია, მცირეოდენი ხელის შევლება ყოველ წელს დასჭირდება. ეს რაში გამოიხატება დრო გვიჩვენებს".

კლდეში ნაკვეთ სამონასტრო კომპლექსს დამთვალიერებლები თითქმის ყველა სეზონზე ჰყავს. ვარძიას ყოველწლიურად 250 000–მდე დამთვალიერებელი სტუმრობს. ტურისტების რაოდენობით პირველ ადგილზე რუსეთი და პოლონეთია, შემდეგ გერმანია, ჰოლანდია და შვეიცარია.
ვარძიაში ბილეთის ფასი შვიდი ლარია, სტუდენტებისთვის და მოსწავლეებისთვის კი ერთი ლარი.

„წელს დაახლოებით 30%–ითაა გაზრდილი ვიზიტორების რაოდენობა. ვარძიის მიმდებარე ტერიტორიის კეთილმოწყობამ, სასტუმროების და კაფეების გაკეთებამ ვფიქრობ, ამაზე მნიშვნელოვანი გავლენა იქონია“, – ამბობს ვარძიის კომპლექსის დირექტორი კახა ზაზაძე.











[თინათინ ზაზაძე, ასპინძა]