ახალქალაქში გაზით ერთი ადამიანი გარდაიცვალა, ორი კი მოწამლულია

საინფორმაციო სააგენტო jnews.ge–ს ფოტო

შემთხვევის შესახებ ინფორმაციას სააგენტო jnews.ge ავრცელებს. როგორც სააგენტო იუწყება 1992, 1987 და 1977 წელს დაბადებული მოქალაქეები ახალქალაქში რუსეთიდან ნათესავის დაკრძალვაზე ჩამოვიდნენ. თვითმხილველების ინფორმაციით, სამივე მათგანს ღამე ერთ ოთახში ეძინათ, ხოლო დილით როცა აღარ გამოჩნდნენ სახლში მიაკითხეს. აღმოჩნდა, რომ სამივე მათგანი უგონოდ იყო.

სასწრაფო დახმარების სამსახურმა ისინი რაიონულ საავადმყოფოში გადაიყვანა. როგორც საავადმყოფოში განმარტავენ, ერთ–ერთი მათგანი საავადმყოფოში უკვე გარდაცვლილი მიიყვანეს. ორი კი მოწამლულია და პირველადი სამედიცინო დახმარების გაწევის შემდეგ ისინი თბილისში გადაიყვანეს.

შსს–ში განმარტავენ, რომ ფაქტზე გამოძიება სსკ–ის 240–ე მუხლით მიმდინარეობს, რაც უსაფრთხოების წესების დარღვევას გულისხმობს.

[თამარ თოთაძე, ახალქალაქი]