ნინოწმინდაში ავტოსაგზაო შემთხვევისას მცირეწლოვანი დაშავდა

შემთხვევა დღეს, 15 აგვისტოს დაახლოებით 13:30 საათზე მოხდა. ინფორმაციას ნინოწმინდის რადიო „ნორი“ ავრცელებს.

„ჯიპის“ მარკის ავტომანქანაში ორი მცირეწლოვანი და ორი მოზრდილი იმყოფებოდა. გზიდან მანქანის გადავარდნის შედეგად, დაშავდა ერთი მოზარდი, რომელიც სასწრაფო-სამედიცინო დახმარების ბრიგადამ ნინოწმინდის საავადმყოფოში გადაიყვანა.

ნინოწმინდის რაიონულ საავადმყოფოში „სამხრეთის კარიბჭესთან“ განაცხადეს, რომ დაშავებულის ზოგადი მდგომარეობა დამაკმაყოფილებელია. მას თვალის მსუბუქი დაზიანება აღენიშნება: „ნინოწმინდის საავადმყოფოს თვალის ექიმი, დღეს ახალქალაქში მორიგეობს, ამიტომ სასწრაფო დახმარების ბრიგადამ, ბავშვი ახალქალაქში გადაიყვანა“.

შსს–ს ინფორმაციით, გამოძიება დაწყებულია ადმინისტრაციულ სამართალდარღვევათა კოდექსის 274-ე მუხლით, რაც ავტოსატრანსპორტო საშუალების ექსპლუატაციის ან უსაფრთხოების წესის დარღვევას გულისხმობს.

[რობი ზარიძე, ნინოწმინდა]