ბიუჯეტის განხილვა მოსახლეობის გარეშე

ახალციხის მუნიციპალიტეტის მომავალი წლის ბიუჯეტის საჯარო განხილვას წყალთბილაში მცხოვრები ასთხიკ სარქისიანი დაესწრო.

„სოფლის გამგებელმა მითხრა პირადად, რომ დღეს განხილვა იყო და წამოვედი“, – ამბობს იგი.

რატომ არ დაინტერესდნენ მისი თანასოფლელები მომავალი წლის ბიუჯეტით, ან იცოდნენ თუ არა მათ იმის შესახებ, რომ დღეს, 24 ნოემბერს საჯარო განხილვა იმართებოდა, სარქისიანმა არ იცის: „ალბათ არ უნდოდათ, არ ვიცი“.



ასთხიკ სარქისიანის გარდა, დღევანდელ განხილვას არცერთი ადგილობრივი არ დასწრებია, თუ არ ჩავთვლით იმ ახალგაზრდებს, რომლებიც “World Vizion” საქართველოს სხვადასხვა პროგრამებში აქტიურად არიან ჩართულები და არა ერთ სოფელში პრობლემების მოგვარებაზეც ზრუნავენ.

მიუხედავად მოსახლეობის სიმცირისა ახალციხის მუნიციპალიტეტის გამგებელი ზაზა მელიქიძე ირწმუნება, რომ ბიუჯეტის განხილვის შესახებ ინფორმაცია ყველა სოფელში გაავრცელეს: „ჩვენმა წარმომადგენლებმა გააგებინეს მათ ამის შესახებ, განცხადებები ყველგან იყო გამოკრული.
ინფორმაცია იდო ჩვენ ვებ გვერდზეც, ეს მედიამაც გაავრცელა“.

კითხვებზე, მაშინ რით აიხსენბა ის, რომ განხილვას მხოლოდ ერთი ადგილობრივი ესწრება და ხომარ მიუთითებს ეს იმაზე, რომ ხალხს ბიუჯეტის განხილვა ნაკლებად აინტერესებს, გვიპასუხა: „პირიქით, დიდ ნდობას გამოხატავენ“.

სარქისიანი ამბობს, რომ 2015 წელს მის სოფელში განხორციელებული პროექტებით კმაყოფილია: „გზა გაგვიკეთეს, გვითხრეს რომ საბავშვო ბაღიც გვექნება. კარგი იქნება თუ კულტურის სახლსაც გააკეთებენ“, – ამბობს იგი, თუმცა, თავისი სურვილისა და სოფელში არსებული პრობლემების შესახებ ბიუჯეტის განხილვისას არ უსაუბრია.

ახალციხის მუნიციპალიტეტში 45 სოფელი და ერთი ქალაქი (ვალე) შედის. მოსახლეობის საეთო რაოდენობა კი დაახლოებით 28 500 შეადგენს. სოფლებში გამგებლის წარმომადგენლები ირწმუნებიან, რომ განხილვები ადგილობრივებთან თავადაც გამართეს და ყველა პრობლემის შესახებ გამგეობას უკვე აცნობეს.

შეგახსენებთ, რომ დღეს, 24 ნოემბერს ახალციხის მუნიციპალიტეტის გამგეობაში მომავალი წლის ბიუჯეტის პროექტი საჯაროდ განიხილეს. დისკუსიას ადგილობრივი თვითმმართველობის, სამხარეო ადმინისრტაციის, არასამთავრობო როგანიზაციებისა და მედიის წარმომადგენლები ესწრებოდნენ.



[თამუნა უჩიძე, ახალციხე]