ფოტოკონკურსი სკოლის მოსწავლეებისთვის

კონკურსის თემაა „საქართველოს ფაუნა – ფოტოგრაფია vs ნადირობა“.

„გადაიღეთ ცხოველები, ფრინველები, მწერები, ამფიბიები და ველური ბუნების სხვა წარმომადგენლები ეზოში, ბაღში, ქუჩაში, ქალაქისა და სოფლის სიხლოვეს, მინდორში, ტყეში... ატვირთეთ ფოტო ჩვენს პორტალზე – Forestry.cenn.org , მოიგეთ ნიკო კეცხოველის სახელობის პრემია და ძალიან მაგარი პრიზები!”, – აცხადებენ კონკურსის ორგნიზატორები.

ფოტოკონკურსს აცხადებს კავკასიის გარემოსდაცვითი არასამთავრობო ორგანიზაციების ქსელი (CENN), გარემოსა და ბუნებრივი რესურსების დაცვის სამინისტროსთან ერთად.

კონკურსი მიმართულია ბრაკონიერობის წინააღმდეგ, რომელიც დიდი საფრთხეა როგორც ველური ბუნებისათვის, ასევე ქვეყნის განვითარებისა და მომავალი თაობების ჯანსაღი მსოფლმხედველობისათვის.

ორგანიზატორების თქმით, საკონკურსო ფოტოზე აღბეჭდილი უნდა იყოს ფაუნის რომელიმე წარმომადგენელი, მასთან დაკავშირებული ცალკეული დეტალი/ასპექტი, ან მოიცავდეს ნებისმიერი სახის ინფორმაციას ფაუნასთან მიმართებაში. ფოტოებმა უნდა წარმოაჩინოს პოზიტიური ფაქტები და მოახდინოს მათი პოპულარიზაცია, ან გაზარდოს ინფორმირებულობა ნეგატიური ფაქტების შესახებ და გამოიწვიოს პროტესტი.

საავტორო ფოტოკონკურსის გარდა, გამოცხადებულია სასკოლო სტენდების კონკურსიც. სასკოლო სტენდზე წარმოდგენილი უნდა იყოს მინიმუმ 10 ფოტო

კონკურსის შესახებ დეტალური ინფორმაცია იხილეთ ამ ბმულზე.

[ნინო ნარიმანიშვილი, ახალციხე]