სტუმარი მინისტრი და პრემიერის წერილი - სამცხე-ჯავახეთის უნივერსიტეტის 25 წლის იუბილე

დასკვნითი საზეიმო ღონისძიება მესხეთის სახელმწიფო დრამატული თეატრის დარბაზში 18:00 საათზე დაიწყო. იუბილეს საქართველოს განათლებისა და მეცნიერების მინისტრი თამარ სანიკიძე, საქართველოს პარლამენტის წევრები, სამცხე-ჯავახეთის სამხარეო ადმინისტრაციისა და ადგილობრივი ხელისუფლების, ასევე, არასამთავრობო სექტორისა და საზოგადოების წარმომადგენლები, სასულიერო პირები, უნივერსიტეტის პროფესორ-მასწავლებელები და სტუდენტები დაესწრნენ.

საქართველოს განათლების მინისტრმა თამარ სანიკიძემ შეკრებილებს უნივერსიტეტის იუბილე მიულოცა და რეგიონში სახელმწიფო უნივერსიტეტის არსებობის მნიშვნელობაზე ისაუბრა.

„ამ 25 წლის განმავლობაში უნივერსიტეტის ზრდა მნიშვნელოვანად სჩანდა. სამცხე–ჯავახეთის უნივერსიტეტი საქართველოს განვითარების მნიშვნელოვანი ფაქტორია, განათლებული ხალხი უკეთეს მომავალს ქმნის“, – აღნიშნა განათლების მინისტრმა.

ქალაქისთვის უნივერსიტეტის მნიშვნელობაზე ისაუბრა ახალციხისა და ტაო-კლარჯთის მიტროპოლიტმა მეუფე თეოდორემ: „25 წელი საკმაოდ დიდი დროა იმისთვის, რომ უნივერსიტეტი ჩამოყალიბდეს და იყოს ღირსული კერა განათლების. ბერები, რომლებიც საფარის მონასტერში ვმოღვაწეობდით, ხშირად ვსტუმრობდით ახალგახსნილ უნივერსიტეტს, ამ წლების განმავლობაში ჩემს თვალწინ იცვლებოდა უნივერსიტეტი. მან ქალაქს ახალგაზრდები შემატა და სიხარული მოუტანა. მადლობა ყველა იმ ადამიანს, ვინც ამ ყველაფრისთვის შრომობდა“.

იუბილეს დასკვნით ღონისძიებაზე, საქართველოს პრემიერ-მინისტრის, ირაკლი ღარიბაშვილის მისალოცი წერილი წაიკითხეს. პრემიერმა უნივერსიტეტს წარმატება და წინსვლა უსურვა.

25 წლის იუბილე უნივერსიტეტს სხვადასხვა ქალაქებიდან მოწვეულმა პროფესორ–მასწავლებლებმა და რექტორებმა მიულოცეს. მათ სამცხე–ჯავახეთის სახელმწიფო უნივერსიტეტსსიმბოლური საჩუქრები, წიგნები და ნახატები გადასცეს.

ასევე სიმბოლური საჩუქრებით, მედლებით დააჯილდოვა მოწვეული სტუმრები სამცხე–ჯავახეთის უნივერსიტეტის რექტორმა მერაბ ბერიძემ.
შეგახსენებთ, რომ სამცხე–ჯავახეთის სახელმწიფო უნივერსიტეტში 25 წლის იუბილესადმი მიძღვნილი ღონისძიებები ნოემბრის დასაწყისიდან აღინიშნებოდა. დღეს უნივერსიტეტის აკადემიურმა საბჭომ საპატიო დოქტორები აირჩია. დღესვე ახალქალაქში სტუდენთტა რეაბილიტირებული საერთო საცხოვრებელი გაიხსნა.





[ვარლამ წიკლაური, ახალციხე]