მთავრობის ადმინისტრაციის დავალება ადიგენის გამგეობას

წერილში საქართველოს მთავრობის ადმინისტრაცია ინფრასტრუქტურის სამინისტროს და ადიგენის მუნიციპალიტეტის გამგეობას გორგულის ხიდის, ასევე ადიგენი–გორგული–უდეს გზის შესახებ საკითხის შესწავლას ავალებს. აღნიშნული დავალება მთავრობის ადმინისტრაციამ ინფრასტრუქტურის სამინისტროსა და ადიგენის გამგეობას მას შემდეგ მისცა, რაც მათ პრემიერ მინისტრის სახელზე "საზოგადოებრივი დარბაზის" ხელმძღვანელისგან გოდერძი კუბლაშვილისგან წერილი მიიღეს.

კუბლაშვილმა გორგულის ხიდთან ადიგენის ათი სოფლის მაცხოვრებლებთან ერთად საპროტესტო აქცია გამართა და საქართველოს პრემიერ მინისტრს ირაკლი ღარიბაშვილს მიმართვა მაშინ გაუგზავნა.

"გთხოვთ განიხილოთ თქვენი კომპეტენციის ფარგლებში წერილში დასმული საკითხები და პასუხი აცნობოთ, როგორც განმცხადებელს, ისე საქართველოს მთავრობის კანცელარიას", – ნათქვამია მთავრობის ადმინისტრაციის წერილში, რომელიც ინფრასტრუქტურის სამინისტროს დაეწერა და ხელს მთავრობის ადმინისტრაციის რეგიონებისა და ადგილობრივი თვითმმართველობის ორგანოებთან ურთიერთობების დეპარტამენტის ზედამხედველობის სამსახურის უფროსი ნიკოლოზ როსებაშვილი აწერს.

კუბლაშვილი იმედოვნებს, რომ როგორც გორგულის ხიდის, ასევე ადიგენი–გორგული–უდეს გზის შესახებ, პრობლემები დადებითად გადაწყდება.

შეგახსენებთ, რომ გორგულის ხდითან საპროტესტო აქცია 28 ოქტომბერს გამართეს და აქციის მონაწილეებმა შესაბამის ორგანოებს პრობლემების მოგვარების მოთხოვნით მიმართეს.

[თამუნა უჩიძე, ახალციხე]