ადიგენში მიმდინარე აქციის მონაწილეები პრემიერს მიმართვას უგზავნიან

მიმართვის ტექსტი აქციის ორგანიზატორმა, „საზოგადოებრივი დარბაზის“ ხელმძღვანელმა გოდერძი კუბლაშვილმა აქციაზეც წაიკითხა.

„სასწრაფოდ,შეკეთდეს ათი სოფლის რაიონულ ცენტრთან დამაკავშირებელი ხიდი, რომელზე მოძრაობაც სახიფათოა როგორც ტრანსპორტისთვის, ისე ფეხით მოსიარულეთათვის. დაიწყოს ადიგენი-გორგული-უდეს ე.წ.სამხედრო გზის რეაბილიტაცია.სასწრაფოდ დაიკეტოს და შეკეთდეს კახარეთის ჰესზე მიმავალი არხი, რამეთუ გორგულის მონაკვეთის მთელ სიგრძეზე ჟონავს წყალი და საშიშროებას უქმნის მოსახლეობას. ხიდის სრულ აღდგენამდე, დაევალოს ადგილობრივ ხელისუფლებას მოსახლეობის უსაფრთხოების მიზნით დააწესოს 24–საათიანი მორიგეობა“, – ნათქვამია განცხადება–მიმართვაში, რომელიც აქციის მონაწილეებმა საქართველოს პრემიერ–მინისტრს უნდა გაუგზავნონ.

გოდერძი კუბლაშვილის განცხადებით, მიმართვას დაურთავენ აქციის მონაწილეთა ხელმოწერებასც.

შეგახსენებთ, დღეს, 28 ოქტმბერს, დილიდან, ადიგენში, ე.წ. გორგულის ხიდთან, ადიგენის 10 სოფლის მოსახლეობა საპროტესტო აქციას მართავს. შეკრებილები გორგულის ხიდის კაპიტალურ შეკეთებას ითხოვენ. აღნიშნული ხიდი, რომელიც ავარიულია, რაიონულ ცენტრთან ათ სოფელს აკავშირებს.

[თამუნა უჩიძე, ნინო ნარიმანიშვილი, ადიგენი]