‘მოგვხედეთ ბატონო პრემიერო’ – აქცია ადიგენში

ადიგენში საპროტესტო აქცია ორგანიზაცია „საზოგადოებრივი დარბაზის“ ორგანიზებით იმართება. ამ დროისთვის გორგულის ხიდთან, ახლომდებარე ათი სოფლის მოსახლეობა იკრიბება.

შეკრებილები გორგულის ხიდის კაპიტალურ შეკეთებას ითხოვენ. აღნიშნული ხიდი, რომელიც ავარიულია, რაიონულ ცენტრთან ათ სოფელს აკავშირებს.

„ამ წუთებშიც კი ადგილობრივი თვითმმართველობა დანაშაულს დანაშაულზე ამატებს. ხიდს დროებით, ხის მასალით არემონტებენ. ეს სახიფათოა და ნებისმიერ დროს შეიძლება ადამიანი ან ადამიანები იმსხვერპლოს“, – აცხადებს აქციის ორგანიზატორი, ‘საზოგადოებრივი დარბაზის’ ხელმძღვანელი გოდერძი კუბლაშვილი.

გორგულის ხიდის გარდა, შეკრებილები კახარეთის ჰესისკენ მიმავალი არხის შეკეთებასაც ითხოვენ.

„არხი სოფლებისკენ მიმავალ გზას მიუყვება და ყველგან ჟონავს. სად როდის რა პრობლემა შეიქმნება არ ვიცით“, – ამბობს გოდერძი კუბლაშვილი.

აქციის მონაწილეები ადგილობრივი და ცენტრალური ხელისუფლების ყურადღებას ითხოვენ.

აქცია გოდერძი კუბლაშვილმა სოციალურ ქსელში, გასულ კვირას დააანონსა. კუბლაშვილმა გავრცელა აქციის მონაწულეთა მოთხოვნებიც:

1.სასწრაფოდ,შეკეთდეს ათი სოფლის რაიონულ ცენტრთან დამაკავშირებელი ხიდი,რომელზე მოძრაობაც სახიფათოა,როგორც ტრანსპორტისთვის ისე ფეხით მოსიარულეთათვის.

2.დაიწყოს ადიგენი-გორგული-უდე ე.წ.სამხედრო გზის რეაბილიტაცია.

3.დაიკეტოს და შეკეთდეს კახარეთგესზე მიმავალი არხი, რამეთუ გორგულის მონაკვეთის მთელ სიგრძეზე ჟონავს წყალი და საშიშროებას უქმნის მოსახლეობას.



[თამუნა უჩიძე, ნინო ნარიმანიშვილი, ადიგენი]