გორგულში ავარიულ ხიდს მომავალ წელს შეაკეთებენ

მთავრობის ადმინისტრაციის დავალების შემდეგ რეგიონული განვითარებისა და ინფრასტრუქტურის სამინისტროში მიიღეს გადაწყვეტილება, რომ 2016 წელს გორგულში ავარიულ ხიდს, ასევე გორგული–უდე–ადიგენის ავარიულ გზას გააკეთებენ.

„გზაც და ხიდიც ადიგენში ძალიან დიდი ხნის პრობლემაა. მომავალი წლის ბიუჯეტში მათთვის თანხა აუცილებლად იქნება გათვალისწინებული და გავაკეთებთ“, – ამბობს რეგიონული განვითარებისა და ინფრასტრუქტურის სამინისტროს საზოგადოებასთან ურთიერთობის სამსახურის წარმომადგენელი ხათუნა პაიჭაძე.

ინფრასტრუქტურის სამინისტროს გარდა, ავარიული ხიდისა და გზის შეკეთების შესახებ, მთავრობის ადმინისტრაციამ წერილი ადიგენის მუნიციპალიტეტის გამგეობასაც დააწერა. თვითმმართველობაში აცხადებენ, რომ არც ხიდი და არც გზა, მათ ბალანსზე არაა, ამიტომ ბიუჯეტიდან მათ შესაკეთებლად თანხას ვერ გამოყოფენ. პრობლემის მოსაგვარებლად კი შესაბამის ორგანოებთან აქტიურად ითანამშრომლებენ.

შეგახსენებთ, რომ 28 ოქტომბერს გორგულის ხიდთან ათი სოფლის მაცხოვრებლებმა არასამთავრობო ორგანიზაცია „საზოგადოებრივი დარბაზის“ ხელმძღვანელის გოდერძი კუბლაშვილის ორგანიზებით აქცია გამართეს და საქართველოს პრემიერ მინისტრს ირაკლი ღარიბაშვილს მიმართვა გუგზავნეს. ამის შემდეგ, მთავრობის კანცელარიამ რეგიონული განვითარებისა და ინფრასტრუქტურის სამინისტროს, ასევე, ადიგენის ადგილობრივ თვითმმართველობას საკითხის შესწავლა დაავალა.

[თამუნა უჩიძე, ადიგენი]