ახალციხის სოფლებში დაზოგილი თანხით ანდრიაწმინდაში წყლის სათავეს მოაწესრიგებენ

აღნიშნულ საკითხზე ახალციხის მუნიციპალიტეტის საკრებულოს დეპუტატებმა დღეს, 11 ნოემბერს გამართულ საკრებულოს სხდომაზე იმსჯელეს.

ახალციხის მუნიციპალიტეტის გამგეობის ინფრასტუქტურის სამსახურის უფროსის, ნოდარ ბალახაშვილის თქმით, ანდრიაწმინდისთვის სოფლის მხარდაჭერის პროგრამის ფარგლებში გამოყოფილ 7 194 ლარს ტენდერიდან დაზოგილი თანხა 2747 ლარი დაემატება, ამ თანხით სოფელ ანდრიაწმინდის წყლის სათავე ნაგებობა მოწესრიგდება: "ეს თანხა საკმარის იქნება სათავე ნაგებობის რეაბილიტაციისთვის. იმ შემთხვევაში, თუ თანხა არ ეყო, ადგილობრივი ბიუჯეტიდან დაემატება“.

დღევანდელ სხდომაზე ჯამში ხუთი საკითხი განიხილეს. ამავე სხდომაზე გაირკვა, რომ საკუთრების უფლების აღიარების კომისიას ორი პირი დაემატება.

დეპუტატებმა მხარი დაუჭირეს „ახალციხის მუნიციპალიტეტის ადმინისტრაციულ საზღვრებში მდებარე გეოგრაფიული ობიექტების სახელდების წესის დამტკიცების თაობაზე“ 2015 წლის 16 სექტემბრის #35 დადგენილების ძალადაკარგულად გამოცხადებას.

ასევე, საკრებულოს წევრებს მიაწოდეს ინფორმაცია მეორადი ავტომობილის შეძენის შესახებ. შეგახსენებთ, გამგეობა გეგმავს ტენდერის გამოცხადებას ავტომობილის შესაძენად. ტენდერი 25.000 ლარზე გამოცხადდება. ახალციხის მუნიციპალიტეტის საკრებულოს თავმჯდომარის, დავით ლომიძის განცხადებით, მანქანა, რომელსაც გამგეობა შეიძენს, 2006 წელზე ნაკლები გამოშვების არ უნდა იყოს.

დღევანდელ სხდომას დეპუტატთა უმრავლესობა ესწრებოდა. მათ ყველა საკითხს მხარი დაუჭირეს.

[ვარლამ წიკლაური, ახალციხე]