ახალციხეში სამი სოფლისთვის 676 კუბური მეტრი საშეშე მასალა გამოიყო

ახალციხის მუნიციპალიტეტის სამი სოფლის:ფერსის, მუგარეთის და გიორგიწმინდის მცხოვრებლებისთვის ტყე–კაფის ადგილი გამოყოფილია. მოსახლეობას ტყიდან ჯამში 676 კუბური მეტრი შეშის გამოტანა შეეძლებათ.

ეროვნული სატყეო სააგენტოში აცხადებენ, რომ 11 დღეა ნებართვა გაცემულია, თუმცა მოსახლეობის მხრიდან აქტიურობა არ შეიმჩნევა.
„გამოყოფილია სამი ტყე–კაფი, 676 კუბური მეტრი შეშა, აქედან ბანკში გადახდილია 186 კუბამეტრის და ტყიდან გამოტანილია 12 კუბური მეტრი“, – აცხადებენ სააგენტოში.

მათივე თქმით, იმისათვის, რომ მოსახლეობას შეშის გამოტანა არ გაუჭირდეს ეროვნულმა სატყეო სააგენტომ ტყე–კაფის ადგილამდე მისასვლელი გზებიც მოაწესრიგა.

შეგახსენებთ, რომ ფერსის, მუგარეთის და გიორგიწმინდის მოსახლეობა, სატყეო საგენტოს უმოქმედობაში ადანაშაულებდა. ადგილობრივები აცხადებდნენ, რომ მიუხედავად მათი არაერთი მოთხოვნისა, ტყე–კაფის გამოყოფა დროულად ვერ მოხერხდა. სატყეო სააგენტოში კი განმარტავდნენ, რომ ნებართვის გაცემა მას შემდეგ დაიწყეს, რაც მოსახლეობამ მიმართა.

[თინათინ ზაზაძე, ახალციხე]