სოფელ წნისში გამოსაზამთრებლად საკმარისი შეშა არ აქვთ

წნისში მცხოვრებ ავთანდილ დევაძეს წელს შეშის ყიდვა მოუწევს. ამბობს, რომ 7 კუბური მეტრი საშეშე მერქანი, რომელიც ბილეთის მიხედვით ეკუთვნის, არ ეყოფა: „მთელი ზამთრის განმავლობაში 15 კუბური მეტრი შეშა მჭირდება, ამიტომ, ნაწილ–ნაწილ ვყიდულობ, როცა ფული მაქვს“.

ადგილობრივები ჩივიან, რომ პრობლემა მხოლოდ ეს არ არის. ისინი ზამთარს მოუმზადებლები იმის გამოც ხვდებიან, რომ ტყე–კაფეები გვიან გამოყეს.

„ერთი კვირის წინ მოგვცეს ტყეში შესვლის ნება, არცშეშა მაქვს და არც ბილეთი. ახლა ტყეში თოვლია, როგორ გამოიტან?! თან ისეთ მიუვალ ადგილზეა, მანქანა და ხარები უნდა იქირაო. ისევ მირჩევნია ნაწილ–ნაწილ ვიყიდო,როცა ფული მექნება“, – ამბობს ზაურ გოგოლაძე.

„ერთი თვე დავდიოდი ბანკში, ტყეში არ იყო გამოყოფილი ნომერი. ახლა დაპობილი და დაწყობილი უნდა მქონდეს შეშა, ამიტომ ნედლი შეშის დაწვა მომიწევს. თან საკმარისიც არ არის. 10 კუბური მეტრი მაინც უნდა გამოგვიყონ“, – ამბობს მევლუდი გოგოლაძე.

წნისში ამბობენ, რომ მათგან განსხვავებით, მეზობელ სოფელში, მაგალითად კლდეში, ადგილობრივებს გაცილებით მეტ შეშას აძლევენ. მათ უკმაყოფილებას სწორედ ასეთი, შერჩევითი მიდგომა იწვევს.

იმ ფაქტს, რომ წნისისგან განსხვავებით კლდეში მოსახლეობა შედრებით მეტ საშეშე მარქანს იღებს, ეროვნულ სატყეო სააგენტოშიც გვიდასტურებენ. სააგენტოში განმარტავენ, რომ ეს სოფლის სტატუსზეა დამოკიდებული, – მაღალმთიანის სტატუსის მქონე დასახლებებს მეტი შეშა ეკუთვნით.

„მაღალმთან სოფლებში ერთ ოჯახზე გამოყოფილია 15 კუბური მეტრი მერქანი, ხოლო იმ სოფლებზე, რომლებსაც სტატუსი არ აქვს, – 7“, – ამბობს ეროვნული სატყეო სააგენტოს ხელმძღვანელი თორნიკე გვაზავა.

რაც შეეხება მოსახლეობის განცხადებას, რომ ტყე–კაფის ადგილების გამოყოფა დაგვიანდა, სატყეო სააგენტოში უარყოფენ და განმარტავენ, რომ სამცხე–ჯავახეთში ტყე–კაფები 1 აგვისტოდან გამოიყო და თავად მოსახლეობა არ აქტიურობდა: „აგვისტოდან შეეძლოთ ბილეთები აეღოთ. დამატებით წერილები გვაქვს გადაგზავნილი მუნიციპალიტეტებში, რომ მოსახლეობა გაეფრთხილებინათ. რატომ არ გამოაქვთ, არ ვიცი“.
მათივე თქმით, მოსახლეობის ინფორმირებულობის მიზნით ადგილობრივებს სოფლების მიხედვით მეტყევეებიც ხვდებოდნენ.

2016 წელს ახალციხის სატყეო უბანზე 164 ტყე–კაფი გამოიყო.

„ახალციხის სატყეო უბანზე გამოიყო პირველი ხარისხის 2871.5 კუბური მეტრი საშეშე მერქანი, ხოლო მეორე ხარისხის 21 980.5 კუბური მეტრი საშეშე მერქანი. გასულ წელს გამოყოფილი საშეშე მერქანიდან, ნაშთის სახით დარჩა პირველ ხარისხზე 710, მეორე ხარისხზე კი 8297.7 კუბური მეტრი მერქანი“, – აცხადებენ სატყეო სააგენტოში.

რაც შეეხება სოფელ წნისში, საშეშე მერქნის მოცულობის გაზრდას, სააგენტოს განმარტებით ეს გამორიცუხლია. შეგახსენებთ, სოფელი წნისი ვერ მოხვდა იმ დასახლებებში, რომლებსაც მიმდინარე წელს მაღალმთიანი დასახლების სტატუსი მინიჭა.

[თინათინ ზაზაძე, ახალციხე]