ხე-ტყის უკანონო ჭრები სამცხე-ჯავახეთში

ბორჯომში დღეს, 24 იანვარს, სამცხე-ჯავახეთის რეგიონული სატყეო-სამმართველოს თანამშრომლებმა უკანონოდ მოჭრილი დაახლოებით 10 კუბური მეტრი ხე-ტყე ამოიღეს.

”მივიღეთ ინფრომაცია, რომ ტყიდან დატვირთული მანქანა გამოვიდა, დაიცალა თუ არა სახერხზე, მაშინვე ვნახეთ. 10 კუბური მეტრი მნიშვნელოვანი ზიანია, ამდენად, სისხლის სამართლის საქმე აღიძრება და ეს საქმე შესაბამის საგამოძიებო ორგანოებს გადაეგზავნება”, - გვითხრა სამცხე-ჯავახეთის რეგიონული სატყეო-სამმართველოს უფროსმა ვიქტორ კირცხალიამ.

გუშინ, 23 იანვარს, კი, სატყეო-სამმართველოს თანამშრომლებმა მუხით დატვირთული სატვირთო მანქანა ადიგენში დააკავეს. კირცხალიას განმარტებით, მოჭრილი ხე, მაღალი მთის მუხა აღმოჩნდა: ”ეს მუხა არის წითელ წიგნშია შეტანილი. დაიწერა ოქმი, დღესაც იყვნენ ტყეში გასულები და ათვალიერებენ მოჭრის ადგილებს”.

ბოლო სამი დღის განმავლობაში მუხის ჭრის 9 სამართალდარღვევის ფაქტი გამოვლინდა.

”მინდა მოსახლოება გავაფრთხილო, რომ ასეთ რამეს ნურასდროს იზამენ, რადგან ყველა ფაქტი აღკვეთილი იქნება, - აცხადებს კირცხალია და ამატებს, რომ ადიგენში მოჭრილი მუხის რაოდენობა 3 კუბურ მეტრამდე გამოვიდა, - თუმცა, ზუსტი რაოდენობა ჯერ არ ვიცით. თუ ზიანი არ აღემაეტბა 1000 ლარს, მაშინ ის ადმინისტრაციულ ჯარიმას ითვალისწინებს. სავარაუდოდ, აქ ზიანის ოდენობა 600 ლარია”.

1 ინავრიდან დღემდე სამცხე-ჯავახეთის რეგიონულ სატყეო-სამმართველოში დაახლოებთ 45 ადმინისტრაციული ჯარიმის ოქმი დაიწერა. აქედან, 35-მდე 10 იანვირს შემდეგაა დაწერილი.

[თამუნა უჩიძე, ახალციხე]