მოსახლეობა სამასალე მერქანს ტყიდან ვეღარ გამოიტანს

ანდრიაწმინდაში მცხოვრებმა ნუგზარ ინასარიძემ ხუთი კუბური მეტრი სამასალე მერქანი ტყიდან სახლის გადასახურად მიიტანა. როგორც თავად ამბობს თითო კუბამეტრში მოსაკრებელი ბანკში 18 ლარი გადაიხადა, ტყიდან მასალის სახლამდე მიტანა კი დაახლოებით 100 ლარი დაუჯდა: „სულ 200 ლარში მოვიტანე მასალა სახლამდე“, – ამბობს ინასარიძე.

საქართველოს მთავრობის N242-ე დადგენილებაში შეტანილი ცვლილებების მიხედვით, მოქალაქეები სამასალე მერქანს ტყეში თვითონ ვეღარ დაამზადებენ. მასალას ტყეში სატყეო სამსახურის თანამშრომლები მოჭრიან და მოქალაქეს დამზადებულს ადგილამდე მიუტანენ. ამაში კი მათ, სამასალე მერქნის ხარისხის მიხედვით, ერთ კუბამეტრში 70–დან–140–ლარამდე თანხის გადახდა მოუწევთ.

„თუ აქამდე სამასალედ ზეზე მდგომი ხე ფასდებოდა და მოჭრის შემდეგ შესაძლოა დაფუტურავებულიც აღმოჩენილიყო, ახლა ასე აღარ იქნება. მოჭრილ სამასალე მერქანს ოთხ სხვადასხვა სორტად დავახარისხებთ და მოქალაქე მას სურვილის მიხედვით შეიძენს“, – ამბობს საქართველოს ეროვნული სატყეო სააგენტოს უფროსი ნათია იორდანიშვილი.

რაც შეეხება ფასს, იორდანიშვილის თქმით, „ეს თითქმის უტოლდება იმ ხარჯებს, რასაც გლეხი მუშების და ბენზო ხერხის დაქირავებაში, ასევე სახლამდე მისატანად ტრანსპორტში იხდიდა“.

ადგილობრივები ფასთან დაკავშირებით, მთავრობის პოზიციას არ იზიარებენ და აცხადებენ, რომ ის რასაც აქამდე საკუთარი ხელით აკეთებდნენ, ახლა ამაში ფასის გადახდა მოუწევთ, ამას კი რეალურად ვერ შეწვდებიან.

„ახლა დადგენილი ფასებით 1 000–1 400 ლარის გადახდა მომიწევდა, ამის საშუალება მე კი არა სოფელში არავის არ აქვს“, – ამბობს ნუგზარ ინასარიძე.



მიმდინარე წელს ახალციხის მუნიციპალიტეტის მერიაში სამასალე მერქნის მოთხოვნით არცერთი განცხადება არ შესულა. გასულ წელს კი თემში დაახლოებით 500 განაცხადი დარეგისტრირდა.

„სულ რამდენი განაცხადი დაკმაყოფილდა ვერ გეტყვით, თუმცა ზუსტად ვიცით, რომ 2 000–ზე მეტი კუბური მეტრი სამასალე მერქანი გაიცა. ის ვინც მასალის გარეშე დარჩა არ ვიცით ძველი წესით მოხდება მათი დაკმაყოფილება თუ შესული ცვლილებების მხიედვით“, – ამბობს ახალციხის მუნიციპალიტეტის მერიის გარემოს დაცვისა და აგრარულ საკითხთა განყოფილების ხელმძღვანელი რამინ მარტინენკო.

კავკასიის გარემოსდაცვითი ორგანიზაციის (CENN) წარმომადგენელი რეზო გეთაშვილი მთავრობის დადგენილებაში შეტანილ ცვლილებებს დადებითად აფასებს და აცხადებს, რომ სამასალე მერქნის ფასის ზრდა ბუნებრივი პროცესია: „ეს იმის ხარჯზე ხდება, რომ ბაზარზე უკანონო ხე აღარ იქნება. არაკანონიერი ყოველთვის იაფია. ფასების შემცირება კი არაკანონიერი ხე–ტყის ხარჯზე არ უნდა ხდებოდეს“.

ცვლილებების პროექტის ავტორი საქართველოს ეროვნული სატყეო სააგენტოა. უწყებაში ფიქრობენ, რომ მერქნით სარგებლობის მოწესრიგება ტყეს მნიშვნელოვნად დაიცავს. ტყეში კი მხოლოდ სატყეო სამსახურების წარმომადგენლები, ან მათი ზედამხედველობის ქვეშ უკვე გადამზადებული და შესაბამისად აღჭურვილი ადგილობრივები იმუშავებენ.

[თამუნა უჩიძე, ახალციხე]